896 Бардыгы /

     БИШКЕК. Кыргыз Республикасынын Президенти Сооронбай Жээнбеков «Мир» Мамлекеттер аралык телерадиокомпаниясынын төрагасы Радик Батыршинди кабыл алды. Жолугушууга ошондой эле «Мир» Мамлекеттер аралык телерадиокомпаниясынын Кыргызстандагы Улуттук филиалынын директору Динара Сүймалиева дагы катышты.

     Президент Сооронбай Жээнбеков «Мир» Мамлекеттер аралык телерадиокомпаниясынын төрагасы Радик Батыршинге «Данакер» орденин тапшырды. Кыргыз Республикасынын мамлекеттик сыйлыгы менен Радик Батыршин КМШ өлкөлөрүнүн элдеринин ортосундагы маданий байланыштарды жана достукту бекемдөөгө кошкон салмактуу эмгеги жана жеке салымы үчүн сыйланды. Кыргыз Республикасынын Президенти тийиштүү Жарлыкка 2018-жылы эле кол койгон. Сооронбай Жээнбеков КМШда эле эмес, бүт дүйнө жүзүндөгү эң  актуалдуу көйгөйлөрдү жана иш-чараларды чагылдыруу боюнча «Мир» Мамлекеттер аралык телерадиокомпаниясынын алгылыктуу иштерин зор канааттануу менен белгиледи.

       -Сиздердин эмгек жамаатыңыздар Шериктешке кирген мамлекеттердеги телекөрүүчүлөрүнүн арасында абдан чоң абройго ээ болуп, компания дүйнөдөгү  мыкты теле каражаттары менен теңата атаандаша ала тургандыгын тастыктады, — деди Президент Сооронбай Жээнбеков.

        Сооронбай Жээнбеков ошондой эле «Мир» Мамлекеттер аралык телерадиокомпаниясынын Кыргызстандагы Улуттук филиалы өлкөбүздөгү эң маанилүү окуяларды күн сайын чагылдырып, кыргызстандыктардын турмушун даңазалап катуу жаткандыгына дагы терең ыраазычылыгын билдирди: – “Мир” телерадиокомпаниясынын Кыргызстандагы Улуттук филиалынын жамааты ар дайым биздин өлкөбүздүн улуттук кызыкчылыктарын гана коргойт жана илгерилетет. Эл аралык маалымат айдыңында Кыргызстандын позитивдүү беделин калыптандырып келатат.

         Ал эми «Мир» Мамлекеттер аралык телерадиокомпаниясынын төрагасы Радик Батыршин ал жетектеген каналдын ишмердигине берилген жогорку баасы үчүн Президент Сооронбай Жээнбековго чоң ыраазычылыгын ачыктады. Ага ыйгарылган жогорку сыйлыкты көп улуттуу жамааттын жана бүтүндөй  телерадиокомпаниянын сыйлыгы катары кабыл алаарын баса белгиледи. Радик Батыршин ошондой эле кийинки жылдары Кыргызстандын жетекчилигинин колдоосун ар дайым сезип тургандыгын дагы кошумчалады.

         -Биз Кыргызстанды телерадиокомпаниябыздын өсүп-өнүгүүсүнүн жана ийгиликтеринин драйверлеринин бири катары көрөбүз. Башкалар менен бирге Кыргызстандын жетекчилигинин дагы колдоосу аркасында КМШдагы бирдиктүү маалымат айдыңы улам өнүгүп бараткандыгы сезилет. Биздин телерадиокомпания дал ушул максатта гана түзүлгөн, — деди «Мир» Мамлекеттер аралык телерадиокомпаниясынын төрагасы Радик Батыршин.

         «Мир» Мамлекеттер аралык телерадиокомпаниясынын төрагасы Президент Сооронбай Жээнбековго экономика, кыргызстандыктар, аймактарды өнүктүрүү жана өлкөнү санариптештирүү тууралуу жаңы долбоорлорду баштоо боюнча телеканалдын пландары жөнүндө дагы өзүнчө баян этти.

Алишер ТОКСОНБАЕВ, өз кабарчы