1,043 Бардыгы /

Өзбекстандын премьер-министри Абдулла Арипов ээлери компенсация алганга чейин имараттарды түрттүрүүгө тыюу салды.

Жергиликтүү басылмалардын маалыматына караганда, өкмөт башчы имараттарды түрттүрүү боюнча жаңы эрежелер 27-июлдан тарта күчүнө кирип, анын аткарылышы президент Шавкат Мирзиёевдин жеке көзөмөлүндө болорун айтты. Жаңы эрежеге ылайык, эми кайсыл бир имаратты түрттүрүүдөн мурда облус акимчиликтери, Каракалпакстандын жана Ташкент шаарынын бийлиги министрлер кабинети менен кеңешиши керек болот.

20-июлда Кашкадарыя облусунун Яккабаг районунда жергиликтүү ишкер насыяга курулган эки кабаттуу үйү менен цехин сактап калууга аракет кылып, акимдин орун басары Мансур Туймаевге бензин чачып, өрт койгон. 27-июлга оогон түнү Хорезм облусунун Ургенч районунда түрттүрүлгөн үйлөрү үчүн убадаланган компенсацияны талап кылып, миңдеген адам Ургенч-Хазарасп унаа жолун тосуп алышкан.

Бул эки окуядан кийин бир катар жергиликтүү аткаминерлер жазаланган. Ургенчтин башчысы Шахрат Абдуллаев менен шаардын прокурору Давлатовго сөгүш жарыяланып, Яккабаг районунун акими Шомурад Донаев менен райондун прокурору Жамшид Халилов иштен алынган.

Мындан тышкары район башчысынын орун басары Мансур Туймаевге каршы кызмат абалын кыянат пайдалануу беренеси менен кылмыш иши козголгон. Ошондой эки облустун башчыларына катуу эскертүү берилди.

Ал ортодо 20-июлда акимдин орун басары Мансур Туймаевге өрт койгон жергиликтүү ишкер Бахриддин Исомов учурда Ташкентте камакта экени белгилүү болду.

www.