1,039 Бардыгы /

МОСКВА. Кыргыз Республикасынын Орусиядагы Элчиси Аликбек Жекшенкулов бул өлкөгө аттанган мекендештерине Кайрылуу жасады. 

“Урматтуу мекендештер!

Эгерде Сиз Орусияга чыгууну пландаштырып жатсаңыз, Орусияга киргенде эле кайрадан чыгарылып кетпеш үчүн жана убактыңызды, ден соолугуңузду, акча каражатыңызды бекеринен коротпоо үчүн билет алаарда алдын ала өзүңүздүн фамилияңызды  Кыргыз Өкмөтүнө караштуу Мамлекеттик миграция кызматынын расмий сайтында www.ssm.gov.kg «Миграционная амнистия 2019» деген бөлүмүндө “кара тизмеде” жок экендигиңиз  боюнча текшерип алууңузду өтүнөм?

Эгерде Сиз “Кара тизмеде” бар болсоңуз, Кыргызстандын Орусиядагы Элчисинин www.elchi.ru расмий блогуна кирип, онлайн түрүндө маалымат жазууну сунуштайбыз. Сиздин макамыңызды тактоо жана “кара тизмеден” чыгаруу иштери үчүн паспортуңуздун электрондук көчүрмөсүн кошо салыңыз?

Мындан тышкары Орусияда жүргөн досторуңуз, туугандарыңыз жана жакындарыңыз байланышка чыкпай, дайыны жок болуп жатса, www.elchi.ru  расмий сайты аркылуу Кыргызстандын Орусиядагы Элчисине жоголгон жаранды табууга жардам көрсөтүү өтүнүчү менен жеке кайрылсаңыз болот. Ал үчүн жарандын  толук аты-жөнү, сүрөтү, паспортунун көчүрмөсү, Орусияга чыккан мезгили, акыркы турган, же иштеген орду тууралуу маалыматтарды жазышыңыз абзел! 

Урматтоо менен,

Кыргыз Республикасынын Орусиядагы Элчиси Аликбек ЖЕКШЕНКУЛОВ.”

Алишер ТОКСОНБАЕВ, өз кабарчы