1,092 Бардыгы /

Америкалык Freedom Now өкмөттүк эмес уюму БУУнун Адам укуктары боюнча жогорку комиссарынын башкармалыгын жарандык активист Серикжан Билаштын маселесин карап, “тез арада чара кабыл алууга” чакырды.

Уюм Билаш жөнүндө 29-июлда петиция жолдогонун кабарлады. Freedom Now Билашты камоо менен Казакстан Адам укуктары боюнча жалпы декларацияны бузуп жатканын белгилеген.

Укук коргоочулардын маалыматында Билаш менен ал жетекчилик кылган “Атажурт ыктыярчылары” уюму Шиңжаңжагы лагерлер тууралуу толук маалымат берген ишенимдүү булак болгону айтылат. Freedom Now жарандык активист төрт айдан бери үй камагында экенине, анын үй-бүлөсүнө кысым көрсөтүлүп жатканынан тынчсызданууда. Уюм ага каршы козголгон кылмыш ишин Билаштын Кытайдагы казактардын укугун коргоо ишмердүүлүгү менен байланыштырды:

— Серикжан Билаш — Кытай лагерлериндеги казактар менен уйгурлардын тагдыры тууралуу тайманбай айткан активист. Аны камоо – Шиңжаңдагы адилетсиздикке элдин назарын бурууга тырышып жүргөндөр үчүн кооптуу белги. Freedom Now казак өкмөтүн Билашты дароо жана эч кандай шарт койбостон бошотууга чакырат.

Серикжан Билашка быйыл март айында “улут аралык кастыкты козутту” деген айып тагылган жана кылмыш иши козголгон. Прокуратура активист андан бир ай мурун Алматыдагы иш-чаралардын биринде чогулгандарды “кытай улутундагыларга каршы жихадга чакырган” деп билдирген. Ал кармалган күнү эле Алматыдан Нур-Султан шаарына жеткирилген жана бөгөт чарасы катары үй камагы тандалган.

Билаш күнөөсүн мойнуна алган эмес жана кылмыш иши саясий негизде козголгонун айтып келет. Серикжан Билаш 29-июлда сотто журналисттердин суроолоруна жооп берип жатып, кылмыш ишине байланыштуу Кытай бийлигин айыптаган. Эгер ал күнөөлүү деп табылса, жети жылга чейин эркинен ажыратылышы мүмкүн.

www.