1,182 Бардыгы /

31-июлда Казакстандагы укук коргоо уюмдарынын тобу бийликти көз карандысыз кесиптик кошуун ишмерлерине карата чыгарылган айыптоо өкүмдөрүн жокко чыгарууга жана өлкө мыйзамдарын эл аралык стандарттарга тууралоого чакырышты.

17-июлда Шымкент шаардык соту «Татыктуу эмгек» кесиптик кошуунунун төрагасы Ерлан Балтабайды уюмдун акчасын кымыруу айыбы менен 7 жылга эркинен ажыраткан. Ал өзүнө тагылган айыптоолорду четке кагууда.

Казакстандын адам укуктар бюросу, «Эл аралык укуктук демилге» уюму жана «Либерти» фонду 31-июлда жарыяланган билдирүүсүндө Балтабайга карата чыгарылган сот өкүмү «өлкө мыйзамдарынын нормалары менен эл аралык стандарттарды одоно бузганын», ошондой эле ал бийликтин «көз карандысыз кесиптик кошуундар кыймылын коркутуу жана жок кылуу өнөктүгүнүн уландысы экенин» белгилешти. Кайрылуунун авторлору бийликтин демилгеси менен жоюлган Казакстандын көз карандысыз кесиптик кошуундар конфедерациясынын лидери Лариса Харькова «ойдон чыгарылган айыптоолордун негизинде» соттолгонун жазышкан. Билдирүүдө укук коргоочулар Балтабай «көз карандысыз кесиптик кошуун ишмердүүлүгүн жүргүзгөндүгү үчүн» куугунтукка алынганын белгилеп, анын тез арада бошотулушун талап кылышты.

Сотто Балтабай доо арызда айтылган каражат жаңы мыйзамга ылайык ишмердүүлүгүн токтоткон «Татыктуу эмгек» кесиптик кошуунуна таандык экенин жана доо арыз жазган жеке тараптын мүчөлүк акыны талап кылууга укугу жок экенин билдирген.

Укук коргоочулар президент Касым-Жомарт Токаев менен Жогорку соттун төрагасы Жакип Асановго жолдонгон кайрылууда бийликти Лариса Харькова, Амина Елеусинова жана Нурбек Кушакбаев өңдүү буга чейин соттолгон көз карандысыз кесиптик кошуун ишмерлерине карата чыгарылган өкүмдөрдү кайрадан карап чыгууга чакырышкан. Мындан тышкары алар бийликти Казакстандын көз карандысыз кесиптик кошуун конфедерациясын каттоого алууга жана жумушчулардын бийликке көз каранды эмес кошуундарды түзүп, аларга өз тандоосу менен кирүүгө мүмкүндүк берүүгө чакырышкан.

www.