1,149 Бардыгы /

Тажикстанда «Азия-плюс» порталынын (news.tj жана asiaplus.tj) сайттары 19-августтан бери бөгөттөлдү. Окурмандар дүйшөмбүдөн тарта VPN жана прокси-сервер аркылуу да кире албай калышты.

Тажикстан Байланыш кызматынын орун басары Илхомжон Атоев бул маселеге мекеменин тиешеси жок экенин билдирди. Анын айтымында, Роскомнадзор «Азия плюс» порталын Орусия аймагындагы тыюу салынган сайттардын тизмесине киргизгенден кийин анын сайттары ачылбай калган:

– Баарын бизге түртө салуу туура эмес. «Азия-плюс» менен маселебиз жок.

26-июлдан тарта Роскомнадзор «Азия плюс» (news.tj) маалымат порталын Орусия аймагындагы тыюу салыган сайттардын тизмесине киргизген.

«Биз тыюу салуунун себебин билели дегенбиз, анан кокустан эле кызматкерлерибиздин биринин почтасынан Роскомнадзордун катын таап алдык. Анда былтыр Хожентте өзүн-өзү өлтүргөн аял тууралуу жарыяланган маалыматка карата эскертүү берилген», – деди «Азия плюстун» редактору Зебо Тажибаева.

Тажибаеванын айтымында, сайтта Согди облусунун жашоочусу Сырдарыяга боюн таштап, өз жанын кыйганы айтылган. Бирок Роскомнадзор маалыматтан суицидди пропагандалоо элементин тапканын билдирген.

– Роскомнадзордун эскертүүсүнөн кийин маалыматты ошол замат өчүргөнбүз, бирок сайт блокко түшүп калган. Бизге убакыт беришкен жок. Сайтка тыюу салуу ушул жаңылыкка байланыштуу болсо керек деп ойлоп жатабыз. Бирок башка себептер дагы болушу мүмкүн.

Орусиялык интернет-провайдерлер «Азия плюс» сайтынын колдонуучуларына Роскомнадзордун буйругу менен бул порталга чектөө киргизилгенин тастыкташкан.

Учурда «Азия-Плюс» маалымат порталы Тажикстандагы алдыңкы сайттардын бири. «Азия-Плюстун» алгачкы бюллетени 1996-жылы чыккан.

www.