1,446 Бардыгы /

Жалал-Абад. Аксы жана Сузак РИИБнин кызматкерлери жаш өспүрүмдөр арасында кылмыштуулуктун алдын алуу, мектеп рекетчилигине жол бербөө максатында окуучулар жана ата-энелер менен жолугушууларды өткөрүшүүдө. Бул туралуу Жалал-Абад ОИИБдин Басма сөз кызматы маалымдады.

Маалыматка ылайык, Аксы район аймагында профилактикалык жумуштарды күчөтүү максатында атайын жолугушуулардын графиги түзүлүп, 12 айыл өкмөттөгү 65 орто мектепте түшүндүрүү иштери жүргүзүлмөкчү. Учурда Жаңы-Жол, Авлетим, Ак-Суу айыл аймактарындагы мектептерде жолугушуулар өткөрүлдү. РИИБдин жашы жете электер менен иштөө инспекциясы, райондук прокуратура, билим берүү бөлүмү, жергиликтүү өзүн өзү башкаруу органдары жана аймактык участкалык инспекторлор мектеп рекетчилигин жоюу, топтошуп мушташуу жана айдоочулук күбөлүгү жок өспүрүмдөрдү автоунаа башкарганга жол бербөө максатында атайын лекцияларды өтүшүп, жаштарды тамеки тартуудан, спирт ичимдиктеринен жана ар кандай терс көрүнүштөрдөн алыс болууга үндөштү.

Ушундай эле жаш өспүрүмдөр арасындагы түшүндүрүү иштери Сузак РИИБи тарабынан да өткөрүлүп, милиция кызматкерлери мектеп окуучулары үчүн атайын лекцияларды өтүштү. Окуучуларга мектепти аяктаган соң туура кесипти тандоо керектиги эскертилип, чакан ишканалардын ишмердүүлүгү, алардын иш процесси менен тааныштырышты. Ошондой эле ата-энелер менен да жолугушуулар уюштурулуп, эрте никеге туруу боюнча түшүндүрүү иштери жүргүзүлүп, өз балдарына ар дайым көзөмөл кылуу керектиги айтылды. Мындан сырткары улуттар аралык мамилелерди чыңдоо, диний экстремизм жана өз жанына кыянаттык кылуу сыяктуу учурдун көйгөйлүү маселелери талкууланды.

“Аймак”