Бирок айыл тургундары бул аракеттерин уурулук катары эсептешпейт:

— Үйлөр суук болуп, газдын басымын жогорулатуу үчүн түтүктөргө насос туташтырууга аргасыз болдук. Азыр баарыбызда газ эсептегичтер бар, колдонгон газ үчүн төлөп жатабыз. Ошондуктан биз муну уурулук деп эсептебейбиз, — деди айыл тургундарынын бири.

Өлкөнүн Энергетика министрлигинин өкүлү газ түтүктөрүнө мыйзамсыз туташып алган адамдар учурдагы абалды дагы да оорлотуп жатканын билдирди.

– Акыркы кездери газ түтүктөрүнө мыйзамсыз туташкандар көбөйдү. Алардын көбү өндүрүш ишканалары. Алар газды көп пайдалангандыктан, лимиттен ашык кетип, газ тартыштыгы жаралды. Мындай учурларга көз жумуп кое албайбыз. Ошондуктан тиешелүү кызматтар тарабынан атайын топтор түзүлүп, рейддер башталды, — деди мекеме өкүлү.

Өзбекстанда сууктун түшүшү менен энергетикалык каатчылык жаралып, айрым аймактарда адамдар газ менен камсыз кылууну талап кылып, унаа жолдорун тосуп алышууда.

28-ноябрдагы видеоселектордук жыйында премьер-министр Абдулла Арипов энергетикалык каатчылыкка жаратылыш газына мыйзамсыз туташуу учурлары жана дебитордук карыздардын төлөнбөй жатканы себеп болгонун билдирген.