992 Бардыгы /

БИШКЕК. Президент Сооронбай Жээнбеков Ооганстан Ислам Республикасынын Кыргызстандагы Элчиси Мохаммад Исса Месбахты дипломатиялык вазийпасынын аякташына байланыштуу кабыл алды. Мында өлкөлөр ортосундагы эки тараптуу, мунун ичинде соода-экономикалык жана маданий-гуманитардык тармактардагы кызматташуунун азыркы абалы жана келечеги тууралуу ачык пикирлер алмашылды.

Мамлекет башчысы Сооронбай ЖээнбековМохаммад Иса Месбахтын Кыргыз-Ооган мамилелерин бекемдөөгө кошкон барандуу салымына токтолуп, Ооганстан менен карым-катнашты тереңдетүү өлкөнүн тышкы саясатынын маанилүү багыттарынын бири экендигин дагы бир ирет кошумчалады. Акыркы жылдардагы эки тараптуу кызматташуунун оң динамикасын, ошондой эле Ооганстан Президенти Мохаммад Ашраф Ганинин Кыргыз Республикасына 2019-жылдын июнь айында ШКУга мүчө мамлекеттердин башчыларынын кезектеги жыйынына катышуунун алкагында жасаган ийгиликтүү иш сапарын жана 2019-жылдын апрелиндеги Ооганстан тышкы иштер министри Салахуддин Раббанинин биринчи расмий сапарын зор канааттануу менен белгиледи. Президент Сооронбай Жээнбеков Мохаммад Исса Месбахка бекем ден соолук, бакубаттуулук жана мындан аркы ишмердүүлүгүндө дагы ири  ийгиликтерди каалады.

Ооганстан Ислам Республикасынын Кыргызстандагы Элчиси Мохаммад Исса Месбах Кыргызстанда өтөгөн дипломатиялык вазийпасынын учурунда ар дайым эки тараптын кызыкчылыктарын эске алуу менен иш-аракет кылганын баса белгиледи. Өз ишин жүргүзүүдө демилгелерине туруктуу колдоо көрсөткөндүгү үчүн өлкөнүн жогорку жетекчилигине терең ыраазычылыгын айтып, Кыргыз-Ооган эки тараптуу кызматташуусу мындан ары дагы жемиштүү өнүгө берээрине ачык ишенимин билдирди.

Алишер ТОКСОНБАЕВ, өз кабарчы