764 Бардыгы /

МАЛАТЬЯ. Кыргыз Республикасынын Түркиядагы  Элчиси Кубанычбек Өмүралиев Туркиянын Малатья шаарына сапарлады. Анын жүрүшүндө Малатья шаарынын губернатору Айдын Баруш менен жолугушту.

Тараптар боордош эки өлкөнүн ортосундагы соода-экономикалык жана инвестициялык кызматташтыкты кеңейтүү зарылдыгын белгилешти. Элчи Кубанычбек Өмүралиев Малатья шаарындагы этникалык кыргыздардын (вандык) кайрылууларына жардам берүү жана аз камсыз болгон үй-бүлөлөр үчүн турак жай бөлүп берүү суранычын ачыктады. Ал эми Малатья шаарынын Мэри Селахаттин Гүркан менен болгон жолугушууда Кыргыз Элчиси Кубанычбек Өмүралиев Кыргыз Республикасынын аймактарды өнүктүрүү жылынын алкагында Баткен менен Малатья шаарларынын ортосундагы достук жана боордоштук байланыштарынын дагы да тыгыз кызматташуусунун зарылдыгын белгиледи. Манас баатырдын элесине арнап Мэр Селахаттин Гүркан Малатья шаарындагы сейил бакты Манас деп атоону сунуштады. Мындан соң эки тараптуу кызматташтыкты өнүктүрү жана тажрыйба алмашуу максатында Кыргыз Элчиси Кубанычбек Өмүралиев Малатья шаарынын Мэри Селахаттин Гүрканды Баткен жана Ысык-Көл облусттарына иш сапар менен келүүгө чакырды. Ошондой эле Кубанычбек Өмүралиев этникалык кыргыздарды мамлекеттик кызматка ишке алуу боюнча суранычтарын кароону дагы катуу өтүндү.

Бул жолугушуулардан мурда Кыргыз Элчиси Кубанычбек Өмүралиев Малатья шаарында жашаган этникалык кыргыздар жана Кыргыз Республикасынын жарандары менен дагы жолугушту. Мекендештер менен кездешүү маалында Кыргыз Элчиси Кыргызстандагы бүгүнкү кырдаал жөнүндө, ошондой эле Түркиянын аймагындагы этикалык кыргыздар жана Кыргыз Республикасынын жарандары менен жүргүзүлүп жаткан иштер туурасында баяндама жасады. Ошондой эле кызыктырган бир катар суроолорго дагы жеринде жооп кайтарды.

МААЛЫМАТ ИРЕТИНДЕ: Малатья – Түркиянын Анадолу өрөөнүнүн чыгышындагы бир миллионго жакын калкы бар административдик борбор. Экономикасында айыл чарба, текстилдик өнөр жай жана курулуш үстөмдүк кылат. Эки уюштурулган өнөр жай зоналары бар (үчүнчүсү курулууда). Түркиянын Малатья шаары дүйнөдө өрүктүн эң ири өндүрүүүчүсү болуп саналат. Бул шаарда 50 пайызы таза өрүк жана 95 пайыз кургатылган өрүк өндүрүлөт. Жалпысынан алганда, таза өрүк дүйнөдөгү оруп-жыюуда 10-15 пайызды жана кургатылган өрүк 65-80 пайызды түзөт. Мындан тышкары булар Малатья шаарында гана өндүрүлөт. Малатьядан жылына болжол менен 250 АКШ долларын түзгөн 100 миң        тонна кургатылган өрүктөр четөлкөлөргө байма-бай экспорттолот.

Алишер ТОКСОНБАЕВ, өз кабарчы