2,190 Бардыгы /

Бүгүн, 25-февраль күнү Жалал-Абад шаарында 1-мартта өтүүчү ири масштабдагы форум тууралуу Жалал-Абад ЖИА ассоциациясынын мүчөлөрү кенен маалымат беришти.

Маалымат жыйынга ЖИА ассоциациясынын башкаруу кеңешинин мүчөлөрү, ишкер айымдардын координатору Жазгуль Жунусбаева, жеке ишкерлер Гүлжамал Караева жана Буниса Мамадалиева катышты.

Биринчи мартта өтүүчү форумга Кыргызстандын ар аймактарынан жана бир катар коңшулаш мамлекеттерден да ишкердик тармагында ийгилик жаратып, жигердүү аракеттенип келе жаткан ишкер айымдардын келүүсү күтүлүүдө.

Анда жеңил өнөр жайдын локомотиви болгон текстил тармагы тандалып алынган. Себеби Жалал-Абадда бул жаатта эмгектенген ишкер айымдар болгону менен ири көлөмдөгү буйрутмаларды аткарууда аксап келишет.

Форумдун максаты учурда  коомдо өндүрүш тармагын колго алган айымдарды бир аянтка чогултуп, ишкердигин өнүктүрүүгө багыт берүү. Аны менен бирге өндүрүмдүн көлөмүн арттыруу жагын жолго коюу болууда. Ага катышууда ишкер айымдардын өндүрүмдөрүнүн ар түрдүүлүгүнө чектөө коюлган эмес. Мында атайын көргөзмө да уюштурулат.

Эске сала кетсек, ЖИА ассоциациясына мүчө болгон ишкерлердин 45 пайызга жакынын айымдар түзөт. Бул форум Жалал-Абадда экинчи жолу уюштурулуп жатат.

Акылай КАРАБАЕВА, “Аймак”