1,099 Бардыгы /

Таш-Көмүр шаарынын мэри Рахман Асаналиев, ШИИБдин начальниги, милициянын подполковниги Азенбек Козукеев жана бир топ жергиликтүү мекеме башчылары менен биргеликте коронавируска байланыштуу түшүндүрүү иштерин жүргүзүштү.

 Жалал-Абад ОИИБдин Басма сөз кызматы кабарлагандай, алар шаар аймагындагы соода түйүндөрдү, базарларды, эл көп топтолчу жайларды кыдырып, санитардык норманын сакталышын көзөмөлгө алышты. Сатуучуларга санитардык-гигиеналык эрежелерди сактоо менен бет кап, кол кап, антисептикалык каражаттарды колдонуу керектигин эскертишти. Такси кызматындагыларга жана банктарга келген атуулдарга азыркы кырдаал туура түшүндүрүлүп, аралыкты сактоо зарылдыгы белгиленди. Ошондой эле жугуштуу илдеттин алдын алууда ар бир жарандын салымы бар экендиги айтылып, негизсиз көчөгө чыкпоого чакырышты.

Мындан сырткары Шамалды-Сай аймактык милиция бөлүмчөсүнүн кызматкерлери жазгы сууга түшүүлөрдүн алдын алуу максатында мектеп мугалимдери менен биргеликте жаш өспүрүмдөргө түшүндүрүү иштерин жүргүзүштү. Нарын дарыясынын жана Шамалды-Сайды аралап өткөн чоң каналдын кооптуу участокторуна эскертүү тактайчалары орнотулуп, сууга түшүп жаткан өспүрүмдөргө эскертүүлөр берилди.

“Аймак”