747 Бардыгы /

ОШ. Ички иштер министринин биринчи орун басары Сүйүн Өмүрзаков Түштүк жергесинде жергиликтүү милициянын шайлоо өнөктүгү учурундагы коомдук коопсуздукту сактоо чараларын жеринде текшерип, Ош шаардык, Ош жана Жалал-Абад облустук ички иштер башкармалыктарынын жетекчилиги жана өздүк курамы менен бетме-бет жолугушуп, атайын жыйын дагы өткөрдү.

– Президенттик шайлоонун жүрүшүндө Ош шаардык, Ош жана Жалал-Абад облустук милициянын жетекчилик курамы шайлоо тилкелериндеги күзөттү ыраса күчөтөт. Анан дагы ар кандай тартип бузуулар орун алса, дароо мыйзам чегинде ыкчам чараларды дагы көрүшөт! Ошол эле учурда коомдук тартиптин туруктуу сакталышы боюнча кошумча тапшырмалар дагы берилди, – деди Ички иштер министринин биринчи орун басары Сүйүн Өмүрзаков.

Буга чейин президенттик шайлоодо коомдук коопсуздукту 11 миңден ашык милиция кызматкери көзөмөлдөөрү маалымдалган. Белгилей кетчү жагдай: үстүбүздөгү жылдын 10-январында Кыргызстанда мөөнөтсүз президенттик шайлоо менен кошо башкаруу тартибин аныктаган референдум дагы өткөрүлөт. Ажолук кызматка учурда 17 талапкер ат салышууда.

Алишер ТОКСОНБАЕВ “АЙМАК”