1,749 Бардыгы /

ЖАЛАЛ-АБАД. “Санарип аймак” долбоорунун алкагында бардык район-шаарларында жарандардын үй-чарба китепчесин толтуруу иштери колго алынат. Өткөн жылы облуста 42 миң 902 үй чарба китепчеси толтурулган. Ал жалпы көрсөткүчтүн 17 пайызын түзгөн.

Облус башчысы Абсаттар Сыргабаев жыл жыйынтыгын чыгарган коллегияда иштин аткарылышы солгундугун белгилеп, тийштүү тапшырмаларды берген. 2020-жылы аймактардан Таш-Көмүр шаарында бир да үй чарба китепчеси толтурулган эмес. Бул жумуш башка айылдарда да алгылыктуу аткарылбаган. 

Бүгүнкү күнгө чейин 4 райондук, 3 областтык маанидеги шаарда “Санарип аймак” программасы ишке киргизилген. Ага жергиликтүү өз алдынча башкаруу органдарынын кызматкерлери атайын онлайн окутуудан өткөрүлгөн. 

Китепчеде үй-бүлө мүчөлөрүнүн ар бири жөнүндө толук маалымат жазылып, жашоо шартынын абалы да камтылат. Демилге ишке ашса “Түндүк” электрондук системасына кошулуу мүмкүнчүлүгү жаралат. Анда заман талабына ылайык жарандардын убактысы үнөмдөлүп, тийиштүү кызматтардан документ жана справкаларды алуу электрондук тартипке өтөт.

“АЙМАК”