936 Бардыгы /

ЖАЛАЛ-АБАД. Жалал-Абад облусундагы кооптуу аймактарда  жашагандарды мажбурлап көчүрүү жараянын ылдамдатуу тапшырмасы берилди. Бул жөнүндө Кыргыз Өкмөтүнүн Жалад-Абад облусундагы ыйгарым укуктуу Өкүлчүлүгүнөн билдиришти.

Маалыматка караганда, кечээ өткөн облустук координациялык кеңешмеде Жалал-Абад облусунун башчысы Абсаттар Сыргабаев жазындагы жаан-чачында кооптуулук азыркыдан дагы жогору болоорун катуу эскертип, айтып, жарандарды мажбурлап көчүрүү жараянын күчөтүүнү тапшырды.

Кыргыз Өкмөтүнүн Жалад-Абад облусундагы ыйгарым укуктуу Өкүлү Абсаттар Сыргабаев дарыя жээктерин бойлото бекемдөө, суу ташкындарынын алдын алууда кооптуу жайларды аныктап, үзгүлтүксүз мониторинг жүргүзүү жагы абдан солгундагандыгын дагы кескин сынга алды. Өз учурунда көрүлгөн аракеттер адам өмүрүн сактап, ири көлөмдөгү материалдык чыгымдардын алдын алаарын эскертти. Кооптуу жайларда бир миң 286 үй-бүлө жашап, буга дейре алардын 942сине жер тилкелери жана ссуда дагы берилген.

Сузак районундагы – 642, Базар-Коргон районундагы – 291, Аксы районундагы – 142, Майлуу-Суу шаарындагы – 100, Жалал-Абад шаарыдагы – 82, Ноокен районундагы – 17, Кара-Көл шаарындагы – 12 кооптуу тилкеде үй-бүлө жансактайт. Ал эми Жалал-Абад облусунун аймагында жалпысынан беш миңден ашуун кооптуу жайлар аныкталган.

Алишер ТОКСОНБАЕВ “АЙМАК”