816 Бардыгы /

Шейшемби күнү эртең менен полиция “Проект” басылмасынын башкы редактору Роман Баданин менен кабарчы Мария Жолобовага тинтүү менен келди. Бул тууралуу басылма өзүнүн телеграм-каналында билдирди.

Баданиндин батиринде тинтүү жүрдү.

Жолобованыкында да тинтүү жүрүүдө. Анын үйүнүн жанында “Проекттин” башкы редакторунун орун басары Михаил Рубин кармалды. Рубиндин ата-энесинин үйүндө тинтүү уланууда, журналистти ошол жакка алып барышкан.

Полиция тинтүү эмне себептен жүрүп жатканын түшүндүргөн жок. Жолобованын адвокаты Василий Кушнир ТАСС агенттигине алар “жалган жалаа” беренеси боюнча козголгон иштин алкагында суракка алынып жатканын айтты. Бул иште бизнесмен Илья Трабер жабырлануучу катары көрсөтмө берүүдө. “Проект” басылмасынын башкы редактору шектүү, Жолобова күбө макамында.

Трабер – петербургдук бизнесмен. “Проект” аны “Путиндин досу” жана “орусиялык мафия ишинин фигуранты” деп атаган. 2020-жылы басылма Трабердин Түндүк деңиз жолун өздөштүрүү пландары жөнүндө иликтөө жарыялаган. “Проект” түзүлө электе эле Роман Баданин менен Мария Жолобова Трабер жөнүндөгү башка бир иликтөөнүн – “Питерликтер. Ата жана уул” даректүү тасмасынын авторлору болушкан. Анда алардын уюшкан кылмыштуу топтор менен ыктымал байланыштары, Владимир Путин менен тааныштыгы жөнүндө сөз болгон. Иликтөөнү “Дождь” телеканалы көрсөткөн.

Мария Жолобова болсо бүгүн “Проект” жарыялаган ИИМдин башчысы Владимир Колокольцев жөнүндөгү иликтөө – тинтүүнүн чыныгы себеби деп эсептейт.

Күн мурун иликтөөнүн анонсу жарыяланып, Орусиянын ички иштер министри Владимир Колокольцев Рублев-Успенский шоссесинде хансарайга жана Ленин проспектисинде батирге ээ экени айтылган.

Мария Жолобова бир канча чуулгандуу иликтөөлөрдүн, анын ичинде чечен президенти Рамзан Кадыров жөнүндө материалдын автору.

Буга чейин “Проект” Владимир Путин жана анын үй-бүлөсүнө жакын кишилер тууралуу иликтөөлөрдү чыгарган. Мындан соң мамлекеттик ЖМКлар басылманы сынга алып, аны батыш каржылай турганын билдиришкен.

WWW.