1,302 Бардыгы /

          Азыркы Кыргыз Бийлиги ар тарабынан туңгуюкка кептелген Кыргыз экономикасын бара-бара жандандырып, аны чукул арада кризистен куткаруу ордуна өлкөбүздүн бейкапар жатышкан калкын саясий шоулар – белдүү инсандарыбызды катарынан камоолор менен гана үзгүлтүксүз алаксытууга бекем ыктады. Мунун кашкайган мисалы – Жогорку Кеңештин бешинчи чакырылышынын төрагасы Асылбек ЖЭЭНБЕКОВ баштаган бир катар депутаттардын күтүүсүз жагдайда кармалып, анан дагы түрмөгө обу жок эле олтургузулушу…

          Түптөлгөндөн бери жалаң гана ызы-чуудан башы таптакыр арылбаган “Кумтөр” алтын комбинатынын калкыбыздын саламатчылыгына орду толгус кесепетин тийгизип, ошондой эле бул аймактын экологиясын катарынан бузуп жаткандыгына аябай кабатырланышып, Ысык-Көл облусунун калкы Жогорку Кеңешке атайын Кайрылуу жасаган. Ошол себептүү Кыргыз парламентинин ошогездеги спикери Асылбек Жээнбеков атайын депутаттык комиссия түзүп,  ошогездеги Жогорку Кеңештеги “Ата Журт” фракциясынын депутаты (азыркы президент) Садыр Жапаровду комиссиянын төрагалыгына, ал эми Жогорку Кеңештеги “Ата Мекен” фракциясынын депутаты Айнуру Алтыбаеваны комиссия төрагасынын орун басарлыгына бекилген.

          Ошентип, арадан төрт ай өткөндөн кийин Жогорку Кеңештин төрагасы Асылбек Жээнбеков түзгөн “Кумтөр” алтын кени боюнча парламенттик комиссиянын тыянагы Жогорку Кеңеште угулат. Ушундан кийин гана “Глобалдуу экологиялык кырсыктардын алдын алуу жана табигый ресурстарды рационалдуу пайдалануу, тоо-кен өнөр жайынын туруктуу өнүгүшүн камсыз кылууга умтулуу менен бирге Кыргызстандын элинин жана Кыргыз мамлекетинин кызыкчылыктарын сактап калуу максатында” Жогорку Кеңештин 2012-жылдын 27-июлундагы №2117 V токтому токулат.

          Жогорку Кеңештин дал ушул тарыхый мүнөзгө ээ токтомунда биринчи пункт менен Парламенттик комиссиянын отчету маалымат иретинде кабыл алынып, ал эми экинчи пунктунда “Кыргыз Республикасынын Өкмөтү менен “Центерра Голд Инк” жана “Кумтөр голд компани” жабык акционердик коомунун ортосундагы 2003-жылдын 31-декабрындагы түзүлгөн Инвестициялык Макулдашуу Кыргыз элинин жана мамлекетинин кызыкчылыгына караманча каршы келет. Ошол негизде Кыргыз Өкмөтүн башкарган шылуундардын (клика – деп ачык-даана жазылган) коррупциялык кызыкчылыктары менен түзүлгөн” – деп бадырайта жазылбады беле…

Эми ошогезде моминтип так жана ачык-даана жазуу расмий документ алкагында дегеле мүмкүн эмес эле. Демек, жогорудагы мисалдардан дапдаана көрүнүп тургандай, Асылбек Жээнбеков Жогорку Кеңештин төрагасы сыңары депутаттык комиссиянын чечимин түгөл бойдон кубаттап, ушуну менен гана чектелбестен, аны легалдаштырууга дагы абдан катуу умтулган. Мындай өз өмүрүн көз көрүнөө тобокелчиликке салып, Мекенинин кызыкчылыгын бекем коргогон азаматыбызды эми дал ошол жакшылыктары үчүн эми темир торго – капаска гана тыгып олтурабыз.

Эң башкысы: Жогорку Кеңештин экс-спикери Асылбек Жээнбековду жана анын кесиптештерин кармоо жана камакка алуу учурунда Кыргыз Республикасынын Баш Мыйзамынын 78-беренеси ачык түрдө, ошондой эле эң эле одоно түрдө бузулду. Анткени, Пармалент мүчөлөрүн кармоодон мурун эң ириде Жогоку Кеңештин гана түздөн-түз макулдугу сөзсүз керек эле…

Кыскасы, көрүнгөн орган кармап, анан жетелеп кеткидей Асылбек Жээнбеков көчөнүн баласы эмес эле. Анткени, ал – Кыргызстандагы эң жогорку Бийликтин бир бутагынын – Жогорку Кеңештин мурунку төрагасы. Ошентип, анын Конституциялык укугу ачыктан ачык эле бузулуп, көз көрүнөө тебеленип-тепселенди. Эми буга ким жооп берет? Баш Мыйзамыбыздын гаранты президент Садыр Жапаровбу? Же анын “Бөрк ал!” десе, “Баш алышкан” кошоматчы прокурор-сотторубу?!?

Алишер ТОКСОНБАЕВ, Кыргыз Республикасынын жалпыга маалымдоо каражаттарын өнүктүрүү жана журналисттердин укугун коргоо фондунун президенти