9 Бардыгы /

Кечээ, 22-январда саат 19:40 чамасында Төө-Ашуу туннелинин алдында эки жолу кар көчкү түшүп, 6 жеңил автоунааны жана 1 «Спринтер» үлгүсүндөгү унааны басып калды. Булардынн арасынан бир жеңил машинаны кар көчкү толук басып таштаган. Бул тууралуу Өзгөчө кырдаалдар министрлигинен (ӨКМден) кабарлашты.

Маалыматка караганда, ӨКМдин куткаруучулары кар көчкүнүн алдында калган автоунаадан 4 жаранды эптеп алып чыгышкан. Ал эми эс-учун жоготкон аял «Тез жардам» автоунаасы  менен ооруканага жеткирилди. Ушул тапта жеринде тазалоо иштери кызуу жүрүп жатат.

ӨКМден кошумчалашкандай, коопсуздукту камсыз кылуу максатында «Арал» жана «Сосновка» бекеттеринде бардык автоунаа кыймылына убактылуу чектөө киргизилди. Өзгөчө  кырдаалдар министрлиги аба ырайынын кескин өзгөрүшүнө байланыштуу жарандарды алыс жолго чыгууда сак болууга, кар көчкү коркунучу бар аймактарда жүрүүдөн алыс болууга чакырат.

Айтмакчы, Ош-Бишкек автоунаа жолунун 127-чакырымында 22-январь күнү, саат 16:20 чамасында дагы кар көчкү түшүп, жол толук убактылуу жабылган. Транспорт жана байланыш министрлигине караштуу №9-Жол тейлөө ишканасынын техникасы жана жумушчулары көчкүнү катарынан тазалап, жол жеңил машиналарга гана ачылгандыгы кабарланды.

Өзгөчө кырдаалдар министрлиги соңку сааттарда тараткан маалыматта Бишкек-Ош жолундагы Төө-Ашууда тынымсыз кар жаап, көчкү жүрүп жаткандыктан элди жолго чыкпай турууга чакырды. ӨКМ өлкөдө 22-январдан тартып аба ырайы кескин өзгөрүп, тоолуу аймактарда кар катуу жаагандыгына байланыштуу, зарылчылык болбосо алыскы жолго чыкпай туруу керектигин, толуу жолдордо кар көчкү коркунучу бар экенин эскертүүдө.

Алишер ТОКСОНБАЕВ, өз кабарчы