942 Бардыгы /

Министрлер кабинетинин токтомуна ылайык 2024-жылдын башынан тарт ып облустук гезиттерди бюджеттен каржылоо токтотулуп, жеке чарбалык эсепке өтүштү. Каржылык жагдайдан улам үч басылма дээрлик жабылды. Ошондктан, айрымдары Медиа интернет айдыңына аргасыздан көчүп, санарип технология өнүгүп, маалыматтар көбүнчө социалдык желе аркылуу элге жетип жаткан чагы. Муну Ош облустук “Ош жаңырыгы” гезитинин башкы редактору Асанбек Каракозуев дагы кабарчыбызга ачык моюндады.

          — Мен азыр журналистиканын эң оор абалга кептелген гезит тармагында иштеп жатам. Өлкөдө эркин гезиттер эмес, мамлекеттен камсыздалган өкмөттүк гезиттердин деле акыбалы оор болуп турган чакта, облустук басылмада иштештин өзү эле айтып бүткүс дастан. Анан калса, азыр облустук гезиттерди жеке каржылык эсепке өткөрүп, «Өзүңдү өзүң бак!» деп бөлүп койгон өткөөл мезгилде иштөө – кыжаалатчылык менен бүдөмүктүктүн айкашкан жери болот экен. Анткени, азыркы интернет заманында гезитке болгон талап жоголуп, анын актуалдуулугу түшүп турган чакта колдоо болбосо, кыйын! Азыр чындап эле гезит окуган адам жок. Ушундай гезитке болгон «кокуй мамиле» заманда жылаңач баатырлар эле иштейт экен деп калдым. Мен мамлекеттикпи, жеке менчикпи, дегеле гезиттерди жоюп салууга каршы пикиримди айтып, алар жашаш керек дегендердин биримин. Азыр менин оюм көпчүлүккө актуалдуу болбогон менен убагы келгенде, гезиттер зор милдетти аткара турганы ырасталат. Ошондуктан менимче, азыр гезиттерде жалаң тарыхтын аскерлери гана иштеп жатышат, – деп кашкайган чындыкты моюндады Ош облустук “Ош жаңырыгы” гезитинин башкы редактору Асанбек Каракозуев. – Мына, биз интернетте сайт ачып, иштетип жатабыз. Социалдык тармактарда активдүү болгонго дагы аракетибиз күч! Кыргызстандагы башка облустук гезиттер деле ушундай аракет көрүп жатышат. Бирок, азырынча атаандашууга эч кандай негиз жок. Менин оюмча, таза атаандаштыкты жандандыруу дегендин түпкү маңызы – мыкты контент жаратуу. Антейин десең, азыр өткөөл заманда ал эмес, редакциянын жашап кетиши тууралуу ойлордун үстүнөн жасалган аракеттер биринчи орунга чыгып калат экен. Келечекте мыкты контент жаратуучулар менен таза атаандаштыкка чыксак керек деп жүрөм.

          Баса, Ош облустук «Ош жаңырыгы» гезити өткөн кылымдын 1938-жылында негизделген. Ошондон бери үзгүлтүксүз гана чыгып келатат.

          Алишер  ТОКСОНБАЕВ, өз кабарчы