9 Бардыгы /

Кыргыз Республикасынын билим берүү жана илим министри Догдуркүл Кендирбаева Ош облусунун Араван, Кара-Суу жана Ноокат райондорунун мугалимдери менен өзүнчө жолугушту.

Кыргыз Өкмөтүнүн мүчөсү Догдуркүл Кендирбаева оштук агартуучуларга «Алтын Казык» билим берүүнү трансформациялоо программасын жүзөгө ашыруунун жүрүшү туурасында кеңири маалымат берип жатып төмөнкүлөргө өзүнчө токтолду: – Мектептерде 12 жылдык билим берүү – биринчи кезекте мазмундук өзгөрүү. Биз быйылкы жылдан тартып 12 жылдык билим берүүнү этабы менен жүзөгө ашыра баштамакчыбыз. Ушул тапта мугалимдерди кайра даярдоо, квалификациясын жогорулатуу, ошондой эле окуу китептерин иштеп чыгуу иштери дээрлик 50 пайызга аткарылды. Жалпы билим берүүнүн мазмунун аныктаган жаңы мамлекеттик билим берүү стандарты иштелип чыгып, Министрлер Кабинетинин токтому менен бекитилди.

Ошондой эле Кыргыз Республикасынын билим берүү жана илим министри Догдуркүл Кендирбаева «Алтын Казык» программасын жүзөгө ашыруунун алкагында мугалимдер үчүн санариптик программалар дагы иштелип чыгып жаткандыгын, алардын баары тең мугалимдерге таратылуучу ноутбуктарга сөзсүз жүктөлөөрүн кошумчалады. Жолугушуунун жүрүшүндө ошондой эле министр соңку мезгилде коомчулукту катуу тынчсыздандырып жаткан өспүрүмдөр арасындагы кылмыштуулук, зордук-зомбулук, билим берүү уюмдарындагы жана үй-бүлөдөгү тарбия маселелерине дагы кеңири токтолду.

– Ата-энелер баласына кымбат уюлдук телефон, кымбат кийим сатып берип коюп, ата-энелик милдеттен кутулдум дебеши абзел! Балага өзүнчө мээрим төгүү – баарынан маанилүү! Биз баланын психологиясын ата-энеге жеткирүүгө милдеттүүбүз. Балдарга коопсуз билим берүү чөйрөсүн түзүү максатында Электрондук күндөлүк платформасына «Коркпо, билдир!» деген баскычты коштурдук. Ал бала зордук-зомбулукка кабылганда, же кандайдыр бир кысымга алынганда, Ички иштер министрлиги менен Билим берүү жана илим министрлигинин өкүлдөрүнө токтоосуз кабар жеткирүүгө мүмкүндүк жаратат. А бул мамлекеттик платформа акысыз жана ыңгайлуу! – деп кошумчалады Кыргыз Республикасынын билим берүү жана илим министри Догдуркүл Кендирбаева.

Ошентип, ааталган жолугушуунун жүрүшүндө Кыргыз Өкмөтүнүн мүчөсү Догдуркүл Кендирбаева мугалимдердин жүйөөлүү суроолоруна дагы жооп кайтарып, жаңы окуу жылына карата даярдыктары, ушугезге дейре чечилбей келе жаткан маселелер туурасында өзүнчө маалымат топтоду.

Алишер ТОКСОНБАЕВ, өз кабарчы