12 Бардыгы /

Кыргыз Республикасынын Маданият, маалымат, спорт жана жаштар саясаты министрлиги тарабынан уюштурулган XIII республикалык театр фестивалы Ош шаарында салтанаттуу түрдө ачылды.

Маданий иш-чарага Кыргыз Республикасынын Маданият, маалымат жана жаштар саясаты министринин орун басары Марат Тагаев, Ош мэринин орун басары Салтанат Аманова, театр тармагынын адистери жана Ош шаарынын тургундары катышты.

Фестиваль Улуу Ата Мекендик согуштагы Жеңиштин 80 жылдыгына жана Кыргыз ССРнин эл артисти, белгилүү актер Сейитказы Андабековдун 100 жылдыгына арналууда.

Фестивалдын тарыхы жана максаты: Алгачкы ирет бул фестиваль 2007-жылы Ош шаарында өткөрүлгөн. 2008-жылы Караколдо улантылып, кийинки жылдары өлкөнүн бардык облустарында өткөрүлүп келген. 2020-жылы пандемия шартында фестиваль алгач жолу онлайн форматта уюштурулган. 18 жыл арадан соң кайрадан Ош шаарында өтүп жатканы – маданий чөйрөдөгү чоң саамалык болуп эсептелет.

Фестивалдын негизги максаты:

-театр сахналарында коюлган спектаклдер аркылуу көрүүчүлөрдү руханий жактан байытуу;

– театр жамааттарынын чыгармачылык байланыштарын чыңдоо;

– Улуу Ата Мекендик согуштун баатырларын жана Сейитказы Андабеков сыяктуу залкар инсандардын эмгегин түбөлүккө даңазалоо.

Бул ирет фестивалга өлкөнүн республикалык, облустук жана райондук деңгээлдеги 14 кесипкөй театры катышып, ар бири бирден спектакль көрсөтөт.

Акыркы жылдары кыргыз театрлары республиканын гана эмес, эл аралык аренада да ийгиликтерге жетишүүдө. Түркия, Россия, Англия, Казакстан, Өзбекстан, Тажикстан, Түркмөнстан жана башка өлкөлөрдө өткөн фестивалдарга катышып келишти. Айрыкча 2026-жылы Франциянын Авиньон шаарында өтө турган дүйнөдөгү эң ири “Авиньон” театр фестивалына жолдомо алышы – кыргыз театр өнөрү үчүн чоң жетишкендик.