6 Бардыгы /

Бүгүн, 26-мартта  Ноокен районуна караштуу Шамалдуу-Сай шаарындагы №59 “Айгүл” мектепке чейинки билим берүү уюмунун имараты капиталдык оңдоп-түзөөдөн өткөрүлүп, кайрадан пайдаланууга берилди.

Ачылыш аземине Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев, район акими Таалайбек Ишенбеков жана айыл тургундары катышты.

Аталган бала бакча 1992-жылы курулуп, ошол эле жылы пайдаланууга берилген. Кийинчерээк мекеменин ишмердүүлүгү токтоп, имарат узак убакыт бою каралбай келген.

Капиталдык оңдоп-түзөө иштери республикалык бюджеттин эсебинен жүргүзүлүп, жалпы 36 млн 900 миң сомдон ашуун каражат жумшалган. Натыйжада имарат толугу менен жаңыланып, заманбап талаптарга ылайык бардык керектүү шарттар түзүлгөн.

Ачылыш аземинде облус башчысы Тилек Текебаев жергиликтүү тургундарды бала бакча имаратынын ачылышы менен куттуктады. Өкүл мекеме балдардын интеллектуалдык жана руханий өнүгүүсүнүн негизги баскычы экенин белгилеп, социалдык объекттерди куруу жана калыбына келтирүү – мамлекеттик саясаттын артыкчылыктуу багыттарынын бири экенин белгиледи.

Мындан тышкары, ыйгарым укуктуу өкүл акыркы жылдары Ноокен районунда аткарылып жаткан иштер, айрыкча билим берүү тармагындагы жетишкендиктер тууралуу жергиликтүү тургундарга маалымат берди.