2,372 Бардыгы /

Жакында Аксы районундагы Абдыкерим Алымов атындагы маданият сарайында Кербен шаарынын тургуну, Аксы аймактык ооруканасынын дарыгери, Кыргызстан улуттук жазуучулар союзунун мүчөсү акын Акматбек Боробаевдин басмадан жаңы чыккан «Жорго саптар» китебинин бет ачар аземи болуп өттү. Аксылык акын Акматбек Боробаевдин буга чейин «Арча жыттуу айылым», «Ай туяк» ырлар жыйнактары чыгып, окурмандар тарабынан жылуу кабыл алынган эле. Аталган салтанатка «Нурборбор» жаштардын чыгармачылык академиясынын президенти, таланттуу акын Нурлан Калыбеков, жазуучу- котормочу Токтобай Мүлкүбатов жана акын, тарыхчы Баяс Турал жана башка чыгармачыл исандар келип катышышты. Салтанатты Аксы райондук элге билим берүү бөлүмүнүн башчысы Анаркул Шырдаков ачып, акындын чырамачылыгына, өмүр жолуна токтолуу менен айрым ырларым толкундануу менен белигеп окуп да берди.
Акын Акматбек Боробаев Аксы аймактык ооруканасында 40 жылдан бери жемиштүү эмгектенип келет. Дарыгер катары эл журтунун сый урматына татыктуу адам. Кыргыз Республикасынын Саламаттык сактоо министрлигинин Ардак Грамотасы менен да сыйланган. Ал эми чыгармачылык менен алектенип калганы бул ата тектен деп айтууга да негиз бар. Анткени Аксы аймагынан чыккан Молдобагыш акындын урпагы, небереси. Акындын көнүл кытыгылаган эң сонун ырлары окурман журту тарабынан жылуу кабыл алынып олтурат.
Таланттуу акын Нурлан Калыбеков акындын чыгармачылык дараметин жогору баалап, «Нурборбор» жаштардын чыгармачылык академиясынын чечими менен акынга Жоомарт Бөкөнбаев атындагы адабий сыйлыгын ыйгарды.
Кечеге келген коноктор акын Акматбек Боробаевдин поэзия дүйнөсү жөнүндө сөз кылышып, ага каалоо-тилектерин айтышып, аягында кечеде акындын ырларына жазылган обондуу ырлар аткарылды.

Абдымомун Калбаев, “Аймак”