1,881 Бардыгы /

БИШКЕК. Белгилүү жазуучу Султан Раевдин “Кара” романы Түркиянын эң ири “Amazon” интернет дүкөнүндө  сатылууда. Бул жөнүндө жазуучу редакциябызга өзү сүйүнчүлөдү.

-Китеп – жазуучунун эң бийик дөөлөту, руханий байлыгы. Аны окурмандар окуп, кызыгуусу артса, окурман жүрөгүнөн орун тапса, андан ашкан бакыт жок! – деди кубанычын тең бөлүштү таанымал жазуучу Султан Раев. – Кечээ күнү Анкаранын чоң китеп дүкөндөрүн кыдырып жүрүп, түркчө чыккан “Timarhane” (“Жанжаза”) романым “Дүйнөлүк адабият” текчесинде сатылып жатканын көрүп, ыраса сүйүндүм. Дүйнөлүк чыгаан жазуучулардын катарында романымдын сатылып жаткандыгы мен үчүн өзгөчө сыймык!

Баса, атактуу америкалык AMAZON компаниясы аркылуу Лондондо жарык көргөн жазуучу Султан Раевдин “Кара” романынын сатылып жатышы жакшы жышаан. Анткени, бул дүйнөлүк монстр Amazon аркылуу сатыкка койгон ар бир товарга, бренддерге өзгөчө талапты коет, ошол эле учурда адабий китептерге дагы талабы жогору. Ошондуктан, булардын таразасынан өтүү өтө оор. Бир чети калемгер  Султан Раев үчүн эле эмес, Кыргыз жазуучусу Чыңгыз Айтматов сап башында турган улут адабияты үчүн дагы абдан чоң сыймык!

Алишер ТОКСОНБАЕВ, өз кабарчы