3,384 Бардыгы /

          БИШКЕК. Кыргызстандын булуң-бурчунда дээрлик кырктан ашуун күтүүсүздөн жер көчкү жүрчү тилкелери бар. Бул туурасында Өзгөчө кырдаалдар министрлигинин адистери эми гана ачыкташты.

Өзгөчө кырдаалдар министрлигинин басма сөз кызматынан кабарлашкандай, аталган тилкелерде жаратылыш кырсыктарынын алдын алуу максатында ал жайларды алдын ала аткылоо жараяны жүргүзүлөт. Бирок, адегенде атайын адистер мындай аймактарды дыкаат жана ар тараптуу изилдешет. Өзгөчө кырдаалдар министрлигинен баса белгилешкендей, кырсыктын дал ушинтип алдын алуу биздин өлкөдө алгачкы ирет гана жүргүзүлүп жатат. Бул долбоорду Азия өнүгүү Банкы каржылап, бул максатка 39 миң доллар ажыратты.

Баса, буга дейре Өзгөчө кырдаалдар министрлиги өлкөбүздө 4 миң 554 жер көчкү жүрүүчү аймак бардыгын жар салган эле. Булардын 1 миң 186сы калк жыш жайгашкан айылдарга жанаша жайланышкандыгын жана аларга түздөн-түз коркунуч жаратаарын дагы далай эскертишкен. Мындай тилкелердин басымдуу бөлүгү Жалал-Абад жана Ош облустарында орун алган.

Алишер ТОКСОНБАЕВ, өз кабарчы