1,245 Бардыгы /

          БАТКЕН. Баткен шаарындагы аэропортту жылдыруу максатында 120 гектар жер каралды. Бирок, жылдыруу туурасындагы шаар бийлигинин расмий катына “Манас” эл аралык аэропортунан эмдигиче жооп келе элек.

Баткен шаардык мэриясынан билдиришкендей,Баткен шаарындагы аэропортту башка жерге заманбап таризде куруу боюнча Баткен районунун Кара-Булак Айыл Өкмөтү менен Баткен шаарынын чектешкен аймагынан 120 гектар жер тилкеси ажыратылган. А түгүл тиешелүү кызматтардан аныктамалар дагы алынып, Баткен шаарынын Башкы планына киргизилген. Ошентип, Баткен шаардык мэриясы тарабынан аталган аэропортту белгиленген жерге куруу боюнча “Манас” эл аралык аэропортуна жана тиешелүү жетекчилерге сураныч каты дагы берилген. Тилекке каршы, каржы булагы жоктугунан курулуш эмдигиче башталбай турат. Ушул тапта аталган аэропортто оңдоп-түзөө жараянына байланыштуу авиакаттамдар токтотулган.

“Манас эл аралык аэропорту” ААКтын басма сөз кызматы 1-августтан 1-ноябрга чейин Баткен аэропорту капиталдык оңдоо иштерине байланыштуу иштебей тургандыгын ачыктаган. Ушул жылдын март айынын бери Баткен–Бишкек каттамында учактар жумасына 3 жолу учары белгилүү болгон.

Алишер ТОКСОНБАЕВ, өз кабарчы