1,167 Бардыгы /

ЖАЛАЛ-АБАД. Кечээ10-11-октябрь күндөрү ИИМдин коомдук коопсуздук кызматынын (ККК) демилгеси менен зордук-зомбулуктардын жана жашы жете электер арасындагы кылмыштуулуктун алдын алууга багытталган семинар Жалал-АбадОИИБде болуп өттү.

Жалал-Абад ОИИБдин басма сөз кызматы билдиргендей,

өткөрүлгөн семинарга ИИМдин КККнын бөлүм башчысы Нуржан Адылова, мобилдүү унаалардын ишмердүүлүгүн колдоо боюнча ассоциациясынын директору Шамшыбек Мамыров, Жалал-Абад ОИИБдин начальниги Ашим Тагаев, ИИМдин академиясынын окутуучулары Азамат Абдрахманов, Медер Карабаев, шаардык, райондук ички иштер бөлүмдөрүнүн кызмат боюнча орун басарлары, жергиликтүү бийлик өкүлдөрүнүн социалдык иштер боюнча орун басарлары, коомдук алдын алуу борборлорунун мүчөлөрү катышышты.

Семинардын жүрүшүндө уюштуруучулар тарабынан даярдалган роликтер көрсөтүлүп, кылмыштуулуктун алдын алуу боюнча лекциялар окулду. Жаш өспүрүмдөрдүн туура эмес багыттагы диний агымдарга кирип калуусуна бөгөт коюу, милициянын көчмө кабылдама унааларында профилактикалык иштерди күчөтүү, үй-бүлөлүк зордук-зомбулуктарга каршы биргелешип иштөө процесстери тууралуу маалыматтар берилди. Балага жардам берүү, коопсуздугун камсыз кылуу, зомбулуктан жабыр тарткан өспүрүм менен сүйлөшүү багыттары жана коомго жат көрүнүштүн кайталануусуна жол бербөө маселелери талкууланды. Негизинен иш-чара коомдук коопсуздук кызматынын кызматкерлеринин квалификациялык деңгээлин жогорулатуу максатын көздөйт.

Семинардын соңунда катышуучулар өздөрүнө пайдалуу маалыматтарды алышкандыгын билдиришип, уюштуруучуларга ыраазычылыктарын айтышты. Ал эми катышуучуларга сертификаттар тапшырылды.