1,983 Бардыгы /

ЖАЛАЛ-АБАД. Бүгүн, 4-ноябрда Жалал-Абад облустук Барпы театрында 7-8-ноябрь–Тарых жана ата-бабаларды эскерүү күнүнө карата иш-чара өттү. Ага Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев, шаар мэри Эрнисбек Ормоков, мекеме-ишканалардын кызматкерлери, тургундар жана жаштар катышты.

Эскерүү иш-чарасында облус башчысы мамлекеттүүлүктү калыптандыруудагы урунттуу учурларга токтолду. Эл-жер, адилеттүүлүк, эркиндик үчүн курман болгон ата-бабаларды эскерип туруу кийинки муундун милдети болуп саналаарын айтты.

Кыргыз элинин эркиндикке жана эгемендикке жапырт умтулуусу 1916-жылдагы окуялардын негизги кыймылдаткыч күчү болгон. Архивдик маалыматтарга ылайык “Үркүндүн” каргашалуу окуялары жана эң көп адам курмандыктары 1916-жылдын күзүндө болгон. Ошол жылдары Кыргызстан эли да чоң жоготууларга учураган.

Уулуттук интеллигенциянын таанымал өкүлдөрүнө, көрүнүктүү чарба кызматкерлерине жана мамлекеттик ишмерлерге карата репрессиялар жаш кыргыз совет республикасынын өнүгүүсүнө кедергисин тийгизген. Репрессия курмандыктарынын көбүнүн тагдыры бүгүнкү күнгө чейин белгисиз. 1917-жылдын 7-ноябрындагы Улуу Октябрь социалисттик революциясы Кыргыз мамлекетинин кайра жаралуусуна шарт түзгөн терең мааниге ээ окуя.