1,023 Бардыгы /

          ОШ. Кара-Кулжа районунда малдардын  асылдуулугун мындан ары арттырууга соңку тапта өзгөчө басым жасалууда. Бул туурасында аталган райондун акими Дамир Кулубаев билдирди.

          – Мал-калдин сапатын ого бетер жакшыртуу максатында Украинадан 20 баш Абердин-Ангус өндүргүч букалар жана дагы 1,7 миллион сомго мыкты ургаачы малдар алып келинип, фермерлерге дароо таратылды. Ушул тапта «Капка-Таш» топоз өндүрүүчү, «Эргеш» Кыргыз уяң жүндүү кой өндүрүүчү жана «Капчыгай тоо балы» аарычылык чарбалары уюшулду. Буларга улай дагы ушундай тогуз чарба асыл тукум ферма макамын алуу үчүн иш  кагаздарын бүтүрүп жатышат, – деп кошумчалады Кара-Кулжа районунун акими Дамир Кулубаев.

          Айтмакчы, Дамир Кулубаев «Капчыгай тоо балы» кооперативи өткөн жылы 40 тонна таза бал өндүрүп, баарын тең Кытай, Казакстан жана Сауд Аравия өлкөлөрүнө тегиз экспорттоп, а мындан мыкты киреше тапкандыгын дагы кошумчалады.

Алишер ТОКСОНБАЕВ, өз кабарчы

КАРА-КУЛЖА МАНАДИЯТ ҮЙҮ ЧАЙКАНАДА ИШТЕП ЖАТКАН ЧАГЫ

          ОШ.  Ош облусунун Кара-Кулжа районундагы Кара-Кулжа айыл өкмөтүнө караштуу 1-Май кыштагында 64390 калк жашайт. Буларды тейлеген айылдык маданият үйү жана китепкана ушул тапта авариялык кейипти кийишкен.

– Айла куругунда Кара-Кулжа айылдык маданият үйү ушул эле кыштактагы чайханада үзгүлтүксүз иш алып барууда, – деп кашкайган чындыкты моюндады Кара-Кулжа районунун акими Дамир Кулубаев. – Аталган обьектилердин план-долбооруна Кара-Кулжа айыл өкмөтү тарабынан 340 миң сом бөлүнүп, бул жумуш дээрлик бүткөрүлдү.

Ошентип, жогоруда саналган обьектилерге өзгөчө кырдаалдлар министрлиги өз корутундусун берсе, жаңы маданият үйү жана китепкана республикалык бюджеттин эсебинен курулмакчы.

Алишер ТОКСОНБАЕВ, өз кабарчы