849 Бардыгы /

          БАТКЕН. Баткен облусуна караштуу Лейлек районунун Кең-Талаа Айыл Өкмөтүнүн Мурас айылында Ата Мекенин коргоп жатып баатырларча курман болгон Жанибек Якубовдун эстелиги ачылды. Бул иш-чарага президенттин Баткен облусундагы ыйгарым укуктуу Өкүлчүлүгүн аппарат жетекчиси Алихан Ураимов, Лейлек районунун жергиликтүү бийлик өкүлдөрү, маркум Якубовдун жакындары жана айылдаштары катышышты.

          Баса, Жанибек Якубов Кыргыз Республикасынын Куралдуу Күчтөрүнүн катарында аскердик кызматын аткарган соң, акыркы алты жылда мамлекеттик чек ара кызматында дагы абийрдүү кызмат өтөп жүргөн. Ал 2022-жылдын 17-сентябрында Кыргыз-Тажик чек арасындагы куралдуу кагылышуу маалында баатырларча курман болгон.

          25 жаштагы чек арачынын эрдигин түбөлүккө калтыруу максатында айылдаштары анын эстелигин тургузуу демилгесин көтөргөн эле. Бул демилгени Кең-Талаа Айыл Өкмөтүнүн жетекчилиги кубаттап, натыйжада эстеликтин курулушу башталган.

          Айтмакчы, 25 жашында жарык дүйнө менен коштошкон баатыр жоокер Жанибек Якубов үй-бүлөдө беш бир туугандын эң кичүүсү эле.

Алишер ТОКСОНБАЕВ, өз кабарчы