924 Бардыгы /

Кыргыз Республикасынын Ички иштер министрлигинин «Унаа» мамлекеттик мекемеси автотранспорт каражаттарын жана аларга менчик укуктарын онлайн режиминде мамлекеттик кайра каттоону ишке ашыруу боюнча пилоттук долбоорун ишке киргизет.

ИИМдин “Унаа” ММдин басма сөз кызматы билдиргендей, Кыргыз Республикасынын Ички иштер министрлиги Кыргыз Республикасынын Санариптик өнүктүрүү министрлиги менен бирге 2023-жылдын 1-сентябрынан тартып 2024-жылдын 1-сентябрына чейин автотранспорт каражаттарын онлайн режиминде кайра каттоо боюнча пилоттук долбоорду жүргүзүп баштайт.
Долбоор ийгиликтүү ишке ашса, долбоор ишин андан ары уланта берет. Автотранспорт каражатын онлайн кайра каттоо жол кыймылынын эрежелерин бузгандыгы үчүн ээсине берилген айыптар, туумдар, салыктар боюнча карызы
жок учурларда жеткиликтүү болот. Онлайн кайра каттоо үчүн автотранспорттун ээси автотранспорт каражатын
визуалдык кароодон өткөрүп, «Унаа» мамлекеттик мекемесинин бөлүмдөрүндө сүрөткө тартып алышы керек, ал эми унааны кароодон өткөндүгү тууралуу маалымат электрондук базада 30 күн сакталат. Бул мөөнөттүн ичинде менчик ээси Кыргыз Республикасынын банктары жана “Түндүк” мамлекеттик порталы
тарабынан иштелип чыккан тиешелүү тиркемелер боюнча электрондук цифралык кол тамга аркылуу онлайн түрдө кайра каттата алат. Никеде алынган транспорт каражатын кайра каттоодо жана нике тууралуу маалыматтар болгондо, жубайы дагы кайра каттоого макулдук берүү үчүн онлайн идентификациядан өтүшү керек. Ошондой эле Кыргыз Республикасынын ички иштер министри У.О. Ниязбековдун тапшырмасы боюнча Кыргыз Республикасынын каржы мекемелери менен бирге алдыңкы эшиктердин каптал терезелерин караңгылатууга уруксат кагаздарына насыя берүү боюнча маселелер каралып жаткандыгын жана автотранспорт каражаттарынын алдыңкы эшиктеринин каптал айнектерин
караңгылатууга уруксат кагазын онлайн режиминде алуу боюнча тиешелүү иш-чаралар жүргүзүлүп жатканын билдиребиз, бул бардык кызыктар жарандарга «Унаа» ММ бөлүмүнө барбастан эле уруксат кагаздарын сатып алууга мүмкүндүк берет.