981 Бардыгы /

     Кыргызстандын Түштүк башкалаасында 45 билим берүү мекемеси өрт коопсуздук эрежелерин таптакыр эле сактаган эмес! Бул туурасында Өзгөчө кырдаалдар министрлигинин басма сөз кызматынан билдиришти.

          Мекеменин маалыматына караганда, Ош шаарынын билим берүү мекемелерине мындан ары дагы бир ай такай көзөмөл жүргүзүлөт. Мектептерге жана бала бакчаларга суу жеңчелерин, түтүктөрүн, ошондой эле өрт өчүрүүчү каражаттарды калыбына келтирүүгө жана башка кемчиликтерди дагы жоюуга убакыт берилди.

          Мындан тышкары мугалимдер менен бирге тарбиячыларга жана окуучуларга өрт коопсуздугун алдын алуу жана болтурбоо максатында профилактикалык түшүндүрүү иштери дагыле кызуу улантылуда.

НООКАТТЫН АКИМИ ӨЗ ЭРКИ МЕНЕН ИШИН ТАПШЫРДЫ

          Ош облусуна караштуу Ноокат районунун акими Данир Иманалиев өз арызына ылайык кызматын тапшырды. Бул туурасында ал өзүнүн социалдык баракчасы аркылуу гана билдирди.

          Баса, Данир Иманалиев Ош облусундагы эң чоң Нооат районунун эки жарым жылча ийгиликтүү гана жетектеди. Артынан бир дагы жаман сөз ээрчиткен жок! Бирок, кызматын эмне себептен тапшыргандыгын алигиче шардана кылбады.

          Эске салчу жагдай: Данир Иманалиев 2016-2020-жылдарда Ысык-Көл районунун акими эле. Андан кийин Борбордук шайлоо комиссиясынын төрагасынын кеңешчиси кызматын дагы аркалаган.

          Айтмакчы, бир катар жалпыга маалымдоо каражаттары Ноокат районунун акими Данир Иманалиевдин кызматтык автоунаасы үстүбүздөгү жылдын 15-ноябрынын түнүндө Ош шаарында автожол кырсыгына кабылгандыгын жазышкан.

Алишер ТОКСОНБАЕВ, өз кабарчы