771 Бардыгы /

ЖАЛАЛ-АБАД. Кечээ, 3-март күнү Жалал-Абад шаарында 3 кабаттуу, 80 орунга ылайыкташкан шаардык балдар ооруканасы ачылды.

Жалал-Абад шаардык мэриясынын маалымат борбору билдиргендей, иш-чарага Саламаттык сактоо министри Алымкадыр Бейшеналиев, Жогорку Кеңештин депутаттары, Президенттин Жалал-Абад облусундагы ыйгарым укуктуу өкүлү Абсаттар Сыргабаев, шаар мэри Эрнисбек Ормоков, “Ассанабил” коомдук кайрымдуулук фондунун директору жана оорукананын курулушуна демөөрчүлүк кылган Кувейттик коноктор, медицина кызматкерлери катышты.

Шаар мэри Эрнисбек Ормоков оорукананы курган “Ассанабил” коомдук кайрымдуулук уюмуна, демөөрчүлүк кылган Абдулла Абдуллазиз Юсиф Альмузайниге, “Шейх Абдулла Нури” кайрымдуулук уюмуна терең ыраазычылык билдирип, белектерди тапшырды. Шаар башчысы өз сөзүндө: “Биз сиздер менен ар дайым кызматташууга жана достук мамилени бекем сактоого даярбыз “,-деп белгиледи.

Балдар ооруканасы 1985-жыл 3 кабаттуу имараты менен 320 керебет болуп ишке берилген болсо, 2000-жылы керебеттери кыскартылып, 110 керебет менен чоңдор ооруканасынын курамына киргизилип, иштей баштаган. 2023-жылдын июль айынан баштап балдар ооруканасы чоңдор ооруканасынын курамынан бөлүнүп чыгып, өзүнчө оорукана болуп 160 керебет менен иштей баштаган. Бул чындыгында жалпы областтын балдары үчүн өтө өз көрсөткүч болгондуктан дайыма орун жетишпестиги көйгөй жаратып келген. Жаңы имаратка

хирургия бөлүмү -25 керебет менен, травматология бөлүмү – 20 керебет менен

кабыл алуу жана кыска мөөнөткө жаткыруу бөлүмдөрү жайгашып, ишин алып бармакчы.

Белгилей кетсек, бул имараттын курулушуна, тийиштүү медициналык жабдыктарына жана катуу, жумшак эмеректерине Кувейт мамлекетинен 66 млн. сом сарпталган болсо, жергиликтүү бюджеттен 13 млн. сом жумшалып, жалпысынан 79 млн. сомго аяктады. Башкача айтканда аталган оорукана “Ассанабил” коомдук кайрымдуулук фонду тарабынан курулуп, айланасын көрктөндүрүү, отканасын куруу жана жылытуу системасын орнотуу жумуштары жергиликтүү бюджеттен каржыланды.

Жалал-Абад областында калктын саны 1 млн. 300 миң болгон болсо, анын 487863 миңи жаш балдар болуп, калктын 33,7%ын түзөт.