501 Бардыгы /

        Ушул жылдын 28-апрелинде боло турган Жогорку Кеңештин депутаттарын шайлоо өнөктүгүнө аралашкандыгы айтылган мамлекеттик кызматкерлерге акыры катаал чаралар көрүлдү. Бул туурасында Ош шаардык мэриясынын басма сөз кызматынан кабарлашты.

Маалыматка караганда, соцтармактарда шайлоо өнөктүгүнө Ош шаар мэриясынын түзүмдүк жана аймактык бөлүмдөрүнүн кызматкерлери дагы аралашып жатышкандыгы туурасында тараган маалыматтын негизинде атайын комиссия түзүлүп, дароо кызматтык териштирүү жүргүзүлгөн. Жыйынтыгында айрым кызматкерлер ишинен бошотулуп, ал эми кээ бирөөлөрүн кызматтан четтетүү сунушу дагы айтылды. Бир катар кызматкерлерге эскертүү жасалды. Маселен, “Сулайман-Тоо” муниципалдык аймактык башкармалыгынын башчысынын орун басары Рустам Эгамбердиев кызматынан шыпырылды. Ош шаардык маданият башкармалыгынын башчысы Элдияр Кадыркуловго, “Ош шаар суу канал” ишканасынын жетекчиси Дөөлөтбек Кокочоровго катуу эскертүү жасалып, анын орун басары Талант Байкишиевди жана Ош шаардык муниципалдык менчик башкармалыгынын кызматкери Камил Камчы уулун кызматтан бошотуу сунушу жетекчилигине жөнөтүлдү. Мындан тышкары Транспорт жана коммуникация министрлигинин Ош облусундагы салмак габаритти көзөмөлдөө департаментинин башчысы Бакай Жолдошбаев менен “ОшГаз” ишканасынын жетекчисинин орун басары Мирбек Маматовго дагы мыйзам чегинде чара көрүү сунушу аталган мекемелерге жөнөтүлдү.

Баса, атайын териштирүүнүн жүрүшүндө шайлоо өнөктүгүнө аралашкандыгы айтылган Ош шаардык маданият башкармалыгынын башчысынын орун басары Улан Эгембердиев, “Ош жылуулук камсыздоо” ишканасынын кызматкерлери Алтынбек Жунусов, Кабылжан Абдибаитов, Раджи Жээналиев, Айзирек Атажанова, Сухраб Сайдуллаев жана Ашимжан уулу Нооруз аталган ишканада иштебей калышкандыгы аныкталды.

Анткени, мындан бир күн мурда эркин журналист Ыдырыс Исаков аталган аткаминерлер жана аларга баш ийген кызматкерлер шайлоодогу талапкерлердин бири Бекмырза Эргешовдун штабында жүрүшкөндүгүн ашкерелееген. Блогердин иликтөөсүндө калаа жетекчиси Бакыт Жетигенов дагы комментарий берип, эгер анда фото-видео далилдер болсо, аталган кызматкерлерге токтоосуз чара көрүлөөрүн убадалаган. А буга чейин Кара-Суу бир мандаттуу округунда мөөнөтүнөн мурда өтүп жаткан парламенттик шайлоодогу талапкерлердин бири “Тоскоолдуктардан улам” жарыштан чыкканын билдирген. Бирок, кандай тоскоолдуктар болгондугун ал ачыктаган эмес.

Ошентип, үстүбүздөгү жылдын 28-апрелинде Ош, Кара-Суу жана Баткен бир мандаттуу шайлоо округдарында Жогорку Кеңештин депутатын мөөнөтүнөн мурун шайлоо өткөрүлөт.

Алишер  ТОКСОНБАЕВ, өз кабарчы