15 Бардыгы /

Бүгүн, 26-февралда Жалал-Абад шаарынын мэри Эрнисбек Ормоков азык-түлүк коопсуздугу боюнча штабдык жыйын өткөрүп, сатуучуларга эттин баасын шаар бийлиги бекитип берген баадан жогорулатпай сатууну эскертти.

Жалал-Абад шаардык мэриясынын маалымат борбору билдиргендей, жыйынга тиешелүү мекеме-ишканалардын жетекчилери, шаар аймагындагы эт саткан ишкерлер катышты.

Шаар мэри Эрнисбек Ормоков сатуучуларга эттин баасын негизсиз жогорулатпоо зарылдыгын эскертип, этти учурдагы баасынан да төмөндөтүү жолдорун карап көрүүнү сунуштады. Ошондой эле, элди арзан баадагы эт менен камсыздоо максатында борбордук базарда акысыз иштетүүгө атайын дүкөн уюштурулганын белгилеп, базар баасынан этти арзан сатам деген ишкерлер болсо бериле турганын билдирди.

Белгилей кетсек, февраль айынын башында эттин бир килограммынын баасы 700 сомго чейин жогорулаганы байкалып, шаар мэри тийиштүү кызматтарга эттин баасын жөнгө салуу тапшырмасын берген. Анын негизинде сатуучуларга түшүндүрүү иштери жүргүзүлүп, учурда жылкы эти 550, уй жана кой эти 650 сомго чейин сатылууда.