9 Бардыгы /

Бүгүн, 12-мартта Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаевдин жетекчилиги алдында укук тартибин жана коопсуздукту камсыз кылуу маселелери боюнча Координациялык кеңешменин жыйыны өттү.

Жыйынга облус аймагындагы укук коргоо жана күч түзүмдөрүнүн жетекчилери, райондук мамлекеттик администрациялардын башчылары – акимдер, шаар мэрлери, ошондой эле тиешелүү мамлекеттик мекеме-уюмдардын жетекчилери катышты. Кеңешменин жүрүшүндө ишкерлердин укуктарын коргоо, үй-бүлөлүк зомбулуктун алдын алуу, облустагы жол-транспорт кырсыктарынын абалы жана коррупцияга каршы маалыматтык саясатты ишке ашыруу маселелери каралды.

Жыйындын жүрүшүндө облус башчысы Тилек Текебаев учурда облуста өзгөчө көңүл бурууну талап кылган бир катар көйгөйлөр бар экенин белгиледи. Алардын ичинде үй-бүлөлүк зомбулук фактыларынын көбөйүшү, жол-транспорт кырсыктарынын катталышы, айрым учурларда ишкерлердин укуктарынын бузулушу жана коррупциялык көрүнүштөргө каршы күрөштү күчөтүү маселелери бар экени айтылды.

Ошондой эле жол коопсуздугун камсыз кылуу, айдоочулардын жоопкерчилигин жогорулатуу, калк арасында профилактикалык жана түшүндүрүү иштерин активдештирүү, үй-бүлөлүк зомбулуктун алдын алуу боюнча комплекстүү чараларды күчөтүү зарылдыгы белгиленди.

Облус башчысы тиешелүү мамлекеттик органдарга жана жергиликтүү бийлик өкүлдөрүнө бул багыттарда жумушту системалуу жүргүзүү, алдын алуу иштерин күчөтүү жана көтөрүлгөн маселелер боюнча натыйжалуу чараларды көрүү тапшырмаларын берди.