1,053 Бардыгы /

ИНДИЯ. Кыргыз Республикасы Мумбайда Бомбейдеги Өнөр жайчылар Ассоциациясы тарабынан уюштурулган «Speed Networking» жылда өткөрүлө турган 7-чи бизнес-форумунун негизги фокус өлкөсү катары көрсөтүлдү. Аталган иш-чарага Кыргыз Республикасынын Индиядагы Элчиси Асеин Исаев, Мумбайдагы экономиканын түрдүү тармактарындагы алтымыштан ашуун алдыңкы компаниялардын өкүлдөрү, ошондой эле бир катар чет мамлекеттердин башкы консулдары жана соода өкүлдөрү дагы катышышты.

Кыргыз Элчиси Асеин Исаев өз сөзүндө Кыргыз Республикасынын инвестициялык жана туристтик мүмкүнчүлүктөрү, ошондой эле Кыргызстан менен Индиянын ортосундагы соода-экономикалык кызматташтыкты өнүктүрүүнүн мүмкүнчүлүктөрү жана келечеги тууралуу кеңири баяндама жасады. Мындан тышкары Кыргыз Республикасынын, өлкөнүн АЭАсынын жана башкалардын инвестициялык мүмкүнчүлүктөрү боюнча тушоо кесүү иш-чаралары дагы байма-бай көрсөтүлдү.  Бизнес-форумдун катышуучулары ошондой эле Мумбайдын бизнес секторунун өкүлдөрүнүн кызыгуусун жараткан Кыргыз Республикасынын ар кандай секторлорундагы инвестициялык долбоорлору менен дагы кенен-чонон таанышышты.

Пленардык отурумдан кийин ар кандай секторлордогу алдыңкы компаниялардын, ошондой эле Мумбайдагы киноиндустриянын өкүлдөрү менен профилдик сессиялар, жолугушуулар жана сүйлөшүүлөр өткөрүлүп, анын жыйынтыгында конкреттүү макулдашууларга дагы жетишилди. Маселен, Кыргыз Республикасынан Индияга жыл сайын 100 тоннага чейин жана 400 тоннага чейин асафетида жемиштерин жеткирилет. Мейманканалардын курулушуна инвестиция салуу боюнча 2021-жылдын аягына чейин бизнес-делегациянын Кыргыз Республикасына сапарын уюштуруу, туристтик делегациялардын, мунун ичинде туристтик сектордун бай секторлорунун өкүлдөрү үчүн гана укмуштуу туризм чөйрөсүндө сапарларын уюштуруу маселелери жайгарылат. Ушул максатта Индия тарап сапарды уюштуруу үчүн Мумбай-Бишкек каттамы боюнча чартердик рейс уюштурууну дагы пландашырууда.

Эң башкысы Болливуд делегациясынын жана башка бир катар киностудиялардын киного тартуучу жерлери жана пейзаждары изилденип, ошондой эле Индия фильмдерин жана клиптерин тартуу максатында Кыргыз Республикасына сапарлар уюштурулат. Индия-ЕврАзия соода Кеңешинин кеңсесинин базасында Кыргыз Республикасынын соода-экономикалык жана инвестициялык мүмкүнчүлүктөрү үчүн атайын зал дагы ачылат. Зер буюмдарын жасоо үчүн Кыргыз Республикасынан Индияга алтын экспорттоо мүмкүнчүлүктөрү, буга улай Кыргызстанда өндүрүлгөн пайдалуу кендерди тышка экспорттоо зарылчылыктары дагы көңүл сынтында калган жок.

Алишер ТОКСОНБАЕВ, өз кабарчы