870 Бардыгы /

ОШ. Кара-Суу районунун Каратай айылында милициянын полковниги Адылбек Султанов атындагы мектепте маркумдун айкели эми орнотулду.

Заманбап айкелди ачуу аземине милициянын отставкадагы генерал-майору Сүйүнбек Ѳмүрзаков, Ош облустук Ички иштер башкармалыгынын начальниги Жеңишбек Абитов, Ош облустук ички иштер башкармалыгынын ардагерлер Кеңешинин тѳрагасы Курсанбек Камчиев, Кара-Суу РИИБсынын начальниги Арабидин Акунбеков, Кара-Суу РИИБсынын ѳздүк курамы жана Адылбек Султановдун жакын туугандары жана жердештери катышышты. Иш-чаранын жүрүшүндө атайын тасма кесилип, эстеликке гүлчамбар дагы коюлуп, маркумдун арбагына багышталып куран окулду. Андан соң баары тең Адылбек Султановду жылуу эскеришип, анын жаркын элеси мекендештеринин эсинде түбөлүк сакталаарын баса белгилешти. Соңунда Кара-Суу РИИБсынын ѳздүк курамы салтанаттуу саптык жүрүш жасады.

Белгилей кетээрибиз: Адылбек Султанов 2010-жылдын 13-июнь күнү Ош коогалаңында улуттар аралык кагылышуунун алдын алуу, эки улуттун ынтымакчылыгын бекемдѳѳ максатында кызматтык милдетин аткарып жаткан мезгилде чагымчыл кылмышкерлер менен күрѳшүү учурунда баатырларча курман болгон. Анын ысмы ѳзү тѳрѳлүп ѳскѳн Каратай аылындагы орто мектепке жана ѳмүрүнүн акырына чейин жетектеген Ош облусундагы Кара-Суу райондук ички иштер бѳлүмүнѳ ыйгарылган.

Алишер ТОКСОНБАЕВ, өз кабарчы