Аймак

Аскарбек АХМАТОВ: “ДОТАЦИЯДАН БОШОНУУ АРАКЕТИБИЗДИ АКТИВДЕШТИРДИК!”

Аскарбек АХМАТОВ: “ДОТАЦИЯДАН БОШОНУУ АРАКЕТИБИЗДИ АКТИВДЕШТИРДИК!”

 1,800 Бардыгы /

Ош облусунун Кара-Суу районундагы Ак-Таш айыл өкмөтү Кыргызстандын Түштүк башкалаасына жакын-ирегелеш, мындайча айтканда, дээрлик тогуз жолдун тоомунда гана жайланышкан. А мында жалаң гана өз кесибинин нукура устаттары эмгектенишкендиктен, айыл өкмөтүнөн эртели-кеч Адам аягы үзүлбөйт. Ошондуктан, биз дагы Ак-Таш айыл өкмөтүнүн башчысы Аскарбек АХМАТОВду эптеп кармап, андан ары капыл-тапыл кепке тарттык.

-Аскарбек мырза. Ак-Таш айыл өкмөтүнүн бир жылдык бюджети негизи эмнелерден куралат?

-Ак-Таш айыл өкмөтүнүн жылдык бюджети 39,4 миллион сом. А мунун 11,5 миллион сому, тактап айтканда, 29,1 пайызы мамлекеттик бюджеттен, 22, 2 миллион сому, же 56,6 пайызы жергиликтүү  бюджеттен, анан калган 5,6 миллион сому, же 14,3 пайызы ата-энелер взносунан куралат. Анткени, Айыл Өкмөтүбүз дагыле 29,1 пайыз мамлекетте дотацияда олтурат.

-Дегиңкиси дотациядан чыгуу аракетиңиздер деле байкалбайт ко?

-Кантип? Дотациядан  биротоло бошонуу максатында жеке ишкерлер – ата мекендик инвесторлор менен иштешүү аракетибизди абдан активдештирдик. Азырынча жергебизге 1 миллион 100 миң сомдук инвестиция тартылып, эки ишкана (тигүү цехи, пескоблок чыгаруучу цех) ачылып, ишке түшүрүлдү. Аймагыбызда жалпы жонунан 17 мөнөр жай ишканасы үзгүлтүксүз гана иштеп жатат.

-Мына. күз күчүндө. Эми көздү жумуп-ачкыча кыш деле баш багат. Деги ызгаарга карата камылгаңыздар кантти экен?

-55 гектарга – күздүк буудай,  168 гектарга – жаздык арпа, 433 гектарга – дандык жүгөрү, 812 гектарга – пахта, 35 гектарга – жашылчаларады, 3 гектарга – бахча өсүмдүктөрүн, 150 гектарга – беде эккен элек. Ушул тапта кылкандуу дан эгиндерин коромжусуз жыйноо жараяны кызыды.

Мындан тышкары экономика тармагын жана жергиликтүү калкыбызды күз-кыш мезгилине дыкаат даярдоо максатында бюджеттик мекемелерди 177 тонна көмүр менен толук кандуу камсыздоо үчүн сатып алуулар порталына жарыя берилип, акырында 1 миллион 62 миң сомдук келишим дагы түзүлдү.

-Баса, “Социалдык контракт” системасы үзүрүн берчүдөйбү?

-Ананчы! Аз камсыз этилгендиктен, мамалекет казынасынан үзгүлтүксүз жөлөк пул алып жүрүшкөн 24 жараныбызга социалдык контракттын негизинде 100 миң сомдон таратылган эле. Мынча каражаттар, албетте, ушул тапта өз максатында гана пайдаланылып жаткан чагы. Анткени, бул контракттын аткарылышын ай сайын социалдык маселелелр боюнча адистерибиз тыкыр текшеришип жана тынбай көзөмөлдөп дагы турушат. Буга эле удаа социалдык контракттын ээлерине кеп-кеңеш дагы берип келатышат.

-Биздин байкашыбызча, ички  жолдорду катарынан оңдоп-түзөп, көчөлөрдү дагы кыдырата жарыктандырып жатыпсыздар го?

йылдарыбыздын бүт ички көчөлөрүнө дээрлик шагыл төгүлүп, андан ары тегизделди. Ал эми  Жылкелди жана Ак-Таш айылдарына сапаттуу асфальт басылды. Жергиликтүү бюджеттен 214,2 миң  сом ажыратылып, таптакыр эскирген аялдамалардын ордуна заманбап стилдеги аялдамалар орнотулду. Ош-Кара-Суу автожолунун бизге караштуу бөлүгү асма шамдар менен жарыктандырылды. Бул автокырсыктын азайышын гана шарттап олтурат.

-Аскарбек мырза, таза суу дагыле башыңыздарды оорутпай эле турабы?

-Ооба. Ак-Таш айыл өкмөтүнө караштуу беш калктуу конуштун дээрлик 94,6 пайызы ичилүүчү таза суу менен камсыз этилген. Ал эми таза суу жете элек кыштактарды дагы ичилүүчү таза суу менен камсыз этүү максатында айыл өкмөтүбүздүн алдында “Ак-Таш – таза суу – Эл байлыгы”  муниципалдык ишанасы жергиликтүү бюджеттин, жеке ишкерлерибиздин жана элдин салымы аркасында бир катар алгылыктуу жумуштарды аткарып жаткан маалы. Ошентип, бул өңүттө беш суу кампабыз такай калк кызматында. 8720 метрге жаңыдан суу түтүктөрү тартылды. Ал эми ичилүүчү сууну сарамжалдуу жанга үнөмдүү пайдалануу иретинде кардарларыбызга эсептегичтер дагы орнотулду.

МААЛЫМАТ ИРЕТИНДЕ

          Ош облусунун Кара-Суу районундагы Ак-Т аш айыл өкмөтү беш кыштактан куралган. Бул жергени төрт улуттун өкүлдөрү байырлашат. 11 миңден ашуун калкы бар. СССР маалын да 1961-жылы бал аймак Коммунизм колхозу болуп уюшулган. Кыргыз Республикасы эгемендүүлүгүн жарыялагандан соң Ак-Таш айыл өкмөтү сыңары калыптанган. Аймакта 2 орто мектеп, 5 балдар бакчасы, бир үй-бүлөлүк дарыгерлер тобу жана жалгыз ФАП бар.   

     Кепке тарткан: Алишер ТОКСОНБАЕВ, өз кабарчы

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17