1,137 Бардыгы /

АКШ Сенатынын эл аралык мамилелер комитети Тажикстандын бийлигин “Озоди” радиосунун журналисттерине кол салгандарды жоопкерчиликке тартууга чакырды.

2-сентябрда Сенат комитетинин “Твиттердеги” баракчасына жарыяланган билдирүүдө журналисттерди коркутуу жана аларга кол салуу жол берилгис экени жазылган.

“Тажикстан “Эркин Европа/Азаттык радиосунун” кызматкерлерине өздөрүнүн журналисттик милдеттерин аткарууга жана чындыкты ачык айтууга уруксат бериши керек”, – деп жазылган билдирүүдө.

Быйыл май айында болгон Тоолуу Бадахшан автоном облусундагы окуялардан кийин Тажикстанда журналисттерди, алардын үй-бүлө мүчөлөрүн коркутуу жана куугунутуктоо учурлары көбөйдү.

17-майда “Озоди” радиосу менен “Настоящее Время” телеканалынын кабарчылары Душанбеде бадахшандык жарандык активист Ульфатхоним Мамадшоевадан интервью алгандан кийин кол салууга кабылышкан. Жарандык кийимчен адамдар алардын кызматтык техникаларын жана жеке мобилдик телефондорун алып кетишкен.

28-май күнү кечинде белгисиз киши “Озоди” радиосунун кабарчысы Муллоражаб Юсуфини көчөдөн токтотуп, үй-бүлө мүчөлөрүнүн ден соолугун ойлосо 17-майдагы кол салуу тууралуу арызды милициядан алышы керектигин айтып коркуткан.

31-августта “Эркин Европа/Азаттык радиосу” медиакорпорациясынын президенти Жейми Флай Тажикстандын президенти Эмомали Рахмонго кат жолдоп, “куугунтуктун жаңы толкунуна жана “Озоди” радиосунун журналисттеринин ишине бут тосуу аракетине каршы” экенин билдирген.

Тажикстан президентинин администрациясы Жейми Флайдын бул билдирүүсүнө жооп берген жок. Бирок буга чейин расмий Душанбе өлкөдө жалпыга маалымдоо каражаттарынын эркин иштеши үчүн бардык шарттар түзүлгөнүн бир нече жолу билдирген.

“Озоди” радиосунун Инстаграмдагы баракчасында 1,5 миллионго, Ютубда 1,8 миллионго жакын катталуучусу бар. Радионун социалдык тармактардагы баракчалары менен сайты Тажикстанда элге так маалымат берген бирден-бир маалымат булагы болуп эсептелет.

WWW.