1,824 Бардыгы /

БАТКЕН. Экстремисттик жана террористтик мүнөздөгү материалдарды жайылтып жүргөн жаран акыры кармалды. Бул туурасында Баткен облустук милициясынан билдиришти.

Баткен облустук ички иштер башкармалыгынын экстремизмге жана мыйзамсыз миграцияга каршы аракеттенүү боюнча кызматы тарабынан жүргүзүлгөн ыкчам-иликтөө иштеринин натыйжасында социалдык тармактарда диний экстремисттик жана террористтик маанайдагы үгүт материалдарын тынымсыз жайылтып жүргөн жаран кармалды. Кадамжай районунун 27 жаштагы тургуну социалдык тармактарда Кыргызстандын аймагында ишмердүүлүгүнө тыюу салынган “ИШИМ” (ИГИЛ) экстремисттик жана террористтик уюмуна тиешелүү символикаларды, аудио материалдарды жана чакырыктарды жайылтууга үлгүргөн. Бул фактынын негизинде тергөө жараяны ушул тапта кызуу жүрүп жатат.

Белгилей кетчүү жагдай: Кыргызстандын аймагында  Ирак, Шам Ислам мамлекети – “ИШИМ” (ИГИЛ) экстремисттик жана террористтик уюмунун өлкө аймагында ишмердүүлүгүнө сот тарабынан таптакыр тыюу салынган.

Алишер ТОКСОНБАЕВ, өз кабарчыбыз