1,170 Бардыгы /

          ОШ. Ош облусунун Кара-Суу районунун аймагындагы май куюучу жайларга жасалма долларларды берип, ордуна сом алып жүргөн жарандар акыры кармалышты.

Ош облустук ИИБдин басма сөз кызматынын маалыматына караганда, акыркы саатарда Ош облустук ички иштер башкармалыгына Кара-Суу районунун Мады айыл өкмөтүнүн 28 жаштагы З.Б. аттуу жаран арыз менен кайрылган. Анда 2023-жылдын 15-июль күнү Кара-Суу районунун Мады Мады айыл өкмөтүндөгү май куюучу бекеттердин бирине жашы 25-30 курактагы жаран келип 100 АКШ доллар берип, 2 миң сомго күйүүчү май куюп, 6 700 сом кайтарым катары алып, артынан дагы 100 АКШ долларын алмаштырып берүүнү суранып, 8 700 кыргыз сомго алмаштырып алып кеткен. Эртеси май куйган жигит отчет тапшырып жаткан учурда аталган акча каражаттары жасалма экендиги билишип калгандыгын билдирген.

Ошентип, аталган факты Ош облустук ички иштер башкармалыгынын маалымат электрондук журналына катталып, текшерүү иштери башталган.
Чогултулган материалдар Кара-Суу райондук ички иштер бөлүмүнүн кылмыштардын бирдиктүү реестрине катталып, Кыргыз Республикасынын Кылмыш-Жаза кодексинин 233-беренеси «Жасалма акчаны же баалуу кагаздарды жасоо» боюнча кылмыш иши козголгон. Тергөө кызматы тарабынан бул акча каражаттарына соттук-техникалык экспертизасына дайындалып, анын корутундусу менен 200 (эки жүз ) АКШ доллар акча каражаты жасалма экендиги аныкталды.

Ошентип, өтө ыкчам жүргүзүлгөн издөө иш-чаралардын негизинде бул кылмышка шектүү сыңары Кара-Суу районунун Кызыл-Кыштак айыл өкмөтүнүн 30 жаштагы Ж.А. аттуу кармалды. Ыкчам-тергөө амалдарынын жүрүшүндө шектүү Ж.А.нын кылмыштуу шериктери дагы аныкталып, Кара-Суу районунун 35 жаштагы Ж.Т. жана 32 жаштагы Т.Д. тургундары кармалышып, убактылуу кармоочу жайга киргизилди. Алар алдын ала сүйлөшүп, жеңил пайда табууну көздөшүп, Кара-Суу аймагында жайгашкан 4 автоунааларга май куюучу жайларда жалпы 1000 (миң) АКШ доллар акча каржатын кыргыз сомго алмаштырып кетикендиги аныкталды.Ушул тапта тергөө амалдары кызуу улантылууда.

Алишер ТОКСОНБАЕВ, өз кабарчы