24 Бардыгы /

Өткөн 2024-жылы Ош облусунун аймагында жаратылыш кырсыктары абдан көп катталып, мунун кесепетинен аймак 246 миллион сомдук зыян тартты. Бул туурасында Ош облустук Жарандык коргонуу тутумунун 2024-жылдагы ишмердүүлүгүнүн жыйынтыгы чыгарылган жыйында айтылды.

Аталган иш-чарага президенттин Ош облусундагы өкүлү Элчибек Жантаев, район акимдери, шаар мэрлери жана жарандык коргонуу кызматтарынын жетекчилери катышты. Кеңешменин жүрүшүндө Өзгөчө кырдаалдар министрлигинин Ош облусу боюнча башкармалыгынын башчысы Эрлан Мусаев 2024-жылда аткарылган иштер боюнча баяндама жасап, жыл ичинде катталган өзгөчө кырдаалдар, алардын кесепеттери жана алдын алуу боюнча жүргүзүлгөн иш-чаралар туурасында кеңири маалымат берди.

Ошентип, өткөн жылы Ош облусунда өзгөчө кырдаалдар өтө көп катталып, булардын арасынан өзгөчө сел кырсыктары олуттуу зыян келтирген. Маселен:

• 36 сел кырсыгы катталган;
• 15 адам каза тапкан;
• 2141 турак үйгө сел кирген;
• 50 турак үй авариялык кейитпрти кийген;
• 27 турак үй капиталдык оңдоого муктаж;
• 46 автоунаага зыян келтирилген;
• 246 075 500 сом материалдык чыгым катталган.

Аталган кеңешменин жыйынтыгында президенттин Ош облусундагы өкүлү Элчибек Жантаев быйылкы жылы өзгөчө кырдаалдардын алдын алуу иштерин күчөтүү боюнча бир катар тапшырмаларды берди. Ошондой эле облус башчысы өзгөчө кырдаалдардын кесепеттерин жоюу жана куткаруучулардын ишин жакшыртуу үчүн Өзгөчө кырдаалдар министрлигинин Ош облусундагы башкармалыгына облустук өнүктүрүү фондунан сатып алынган жаңы жабдуулар жана автоунааларды тапшырды.

Алишер ТОКСОНБАЕВ, өз кабарчы