9 Бардыгы /

Ош облусуна караштуу Кара-Кулжа районунун борбору Кара-Кулжа кыштагында Улуу Ата Мекендик согушка катышкандарга атайын арналып эстелик тургузулган. Улуу Жеңиштин быйылкы 80 жылдыгынын урматына аталган Аймактагы ак элечек апалар – жарандык активисттер жоокерлердин эстелигине гүл чамбар коюшуп, анан дагы маркумдарга багыштап куран окушту.

Урматкан МУРЗАКМАТОВА, “Кара-Кулжа районундагы “Ак элечек” коомунун төрайымы: 

– Аталар төрөлө элек биз үчүн, кала берди танк алдында тепселип…

Демек, биз бул муунду – Улуу Ата Мекендик согуштагы баатырларыбызды эч качан унутууга акыбыз жок! Анткени, биздин бүгүнкү эгемендүүлүккө чындап чыйыр салган ушул азаматтарыбыз эмеспи… 

Гүлжамал АДИЕВА, “Шайыр Апалар” коомдук уюмунун жетекчиси:

– Арман! Аталарыбыздын жана абаларыбыздын дээрлик басымдуулугу кан майдандан кайтпай гана калышты. Басымдуулугу фронтто Мекенибиз СССР үчүн окко учушту.

Эң эле өкүнүчтүү : кырчындай кезинде майданга аттанышкандыктан, далайынын артында тукум улаар туяк деле калган жок! Дагы кейиштүүсү: кан майданда немис баскынчылары менен аеосуз салгылашкандардын катары жыл өткөн сайын улам суюлуп гана баратат…

9-майда, Жеңиш күнү гана биз буларды эскерип, эстелигине гүл чамбар койгонубуз дээрлик аздык кылат! Менимче, буларды дайыма эскерип, арбактарына багыштап куран дагы окуп,  азаматтарыбыздын кайталангыс эрдиктерин ар бирибиз дагыле ар дайым үлгү тутунууга милдеткербиз!

Аттиң.. Кара-Кулжалык апалардын мындай жосуну – саамалыгы республикабыз боюнча жайылта турган саамалык. Анткени, эрдиктер эскирбейт! Андыктан, баатырларыбызга биз бекем баш ийип, чоң таазим кылып, шумкарларыбызды байма-бай эскерип турууга тийишпиз!

Алишер ТОКСОНБАЕВ, өз кабарчыбыз