1,274 Бардыгы /

Тажикстанда тыюу салынган Ислам кайра жаралуу партиясынын өмүр бою эркинен ажыратылган төрага орун басары Махмадали Хаиттин жубайы Савринисо Жураева акыйкатчыга кайрылып, күйөөсү абакта кыйноого кабылып жатканына даттанды.

Быйыл мартта Жураева маалымат каражаттарына күйөөсү кыйноого кабылып жатканын билдирип, тиешелүү органдарга кайрылуу жөнөткөн. Анда ал борбордогу тергөө абагынын жетекчилиги Махмадали Хаиттен мамлекеттик телеканалдар аркылуу Ислам кайра жаралуу партиясын айыптаган сөздөрдү айтууну талап кылып жатканын билдирген.

18-июлда Савринисо Жураева анын беш айдан бери жазган кайрылууларына Жазаларды аткаруу кызматы гана жооп бергенин белгиледи. «Мекеме менин кыйноолор тууралуу катымдагы билдирүүлөр негизсиз деп жооп берди. Алар мен келтирген фактыларды текшерип чыгып, кыйноо болгондугу боюнча ырастоолор табылбаганын айтышты», — деди ал.

Савринисо Жураева акыркы жолу күйөөсү менен быйыл мартта жолукканын, эмки жолугушуу сентябрга белгиленгенин кошумчалады.

2016-жылы июнда Тажикстандын Жогорку соту Махмадали Хаитти өлкөнүн мурдагы коргоо министринин орун басары Абдухалим Назарзоданын аскердик төңкөрүш жасоо аракетине тиешеси бар деп таап, өмүр бою эркинен ажыраткан. Бул иштин алкагында Ислам кайра жаралуу партиясынын жетекчилик курамы дээрлик толугу менен камалып, партия террордук деп табылып, анын өлкөдөгү ишмердүүлүгүнө тыюу салынган.

Былтыр жазында БУУнун негизсиз камоо учурлары боюнча жумушчу тобу Душанбеден 60 жаштагы Махмадали Хаитти тез арада бошотууну талап кылган. Быйыл БУУнун бул талабына дагы тогуз укук коргоо органы кошулду.

Июлдун башында БУУнун Адам укуктары боюнча комитетини Женевадагы сессиясында сүйлөгөн Тажикстандын башкы прокурору сотто Хаиттин күнөөсү толугу менен далилденип, ал мыйзамдуу жазага тартылганын билдирген.

www.