683 Бардыгы /

Алматы шаардык полиция департаменти «Азаттыктын» казак кызматынын жана бир нече башка басылмалардын журналисттерине кол салуу фактысы боюнча тергөө иштери башталганын билдирди.

Мекеменин маалыматына караганда, Адам укуктары боюнча бюронун басма сөз жыйыны үзгүлтүккө учурап, кабарчыларга кол салуу болгондон кийин полицияга беш киши — жыйындын уюштуруучулары менен журналисттер арыз менен кайрылышкан. Ошол эле маалда дагы үч адам «иш-чара уюштуруучулары жана журналисттер алардын денелерине зыян келтиргенин» айтып, укук коргоо органдарына даттанышкан. «Бул факты боюнча соттук-медициналык экспертиза жүргүзүлөт», — деп билдирди полиция депарламентинин басма сөз кызматы.

«Азаттыктын» казак кызматынын кабарчысы Нургүл Тапаева менен видеооператор Токмолда Кусаинов Алматыда 22-июлда кол салууга дуушар болушкан. Анда аларга белгисиз беш аял чабуул жасап, видеокамераны талкалап, кабарчыга кол көтөрүшкөн.

Кабарчылар «Казакстандын демократиялык тандоосу» кыймылына катышы бар деген шек менен кармалган көп балалуу эне Оксана Шевчук менен жалгыз бой эне Гүлзипа Жаукерованын иши тууралуу маалымат жыйынын чагылдырууга барышкан.

​Адам укуктары боюнча бюронун кызматкери Сергей Дувановдун айтымында, жыйырмага чукул аял басма сөз жыйыны башталганга чейин келип, иш-чараны үзгүлтүккө учуратып, журналисттердин смартфон жана камераларын талкалап, чуу көтөрүшкөн. Жабыркагандардын арасында «Азаттыктын» казак кызматынын, КазТАГ агенттигинин жана «Алматы» телеканалынын журналисттери болгон.

Полиция чакыруудан жарым саат өткөндөн кийин келген. Журналисттердин айтымында, ага чейин кол салгандар имараттан чыгып кетишкендиктен, полиция бир гана аялды кармоого жетишкен.

Бул «Азаттыктын» казак кызматынын кабарчыларына жасалган биринчи жолку кол салуу эмес. 6-июлда белгисиз киши кабарчы Оркен Жоямерген менен оператор Ержан Амирхановго көздөн жаш агызуучу газ чачып кеткен. Алар Казакстандагы кармоо жараянын чагылдырып жүрүшкөн. Полицияга даттанышканы менен чара көрүлгөн эмес.

www.