898 Бардыгы /

БИШКЕК. Кыргыз Республикасынын Президенти Сооронбай Жээнбеков кыска мөөнөттүү эмгек өргүүсүн жыйыштырып, Ысык-Көлдөн Бишкекке токтоосуз кайтып, бүгүн Кыргыз Республикасынын Коопсуздук  Кеңешинин чукул жыйынын өткөрдү.

Мамлекет башчысы баса белгилегендей, Экс-Президент Алмазбек Атамбаев Кыргыз Республикасынын Баш Мыйзамынын жана мыйзамдарынын талаптарын одоно түрдө бузуп, тергөө иштерин мыйзам алкагында аткарууга катуу куралчан каршылык көрсөттү. Сооронбай Жээнбеков белгилегендей, Кыргыз Республикасы укуктук мамлекет. Мамлекеттин милдети — бардык жарандар мыйзамдын талаптарын кынтыксыз сактоосун камсыз кылуу. Мамлекет башчысы Коопсуздук Кеңешинин мүчөлөрүнө ачык эле кайрылып, чукул арада мыйзамдуу чараларды кабылалуу керектигине байланыштуу мыйзамдуулукту, өлкөдөгү тынчтыкты жана коопсуздукту сактоо боюнча бардык иш–чараларды аткаруунун зарылдыгын баса белгиледи.

УКМК төрагасы Орозбек Опумбаев, Ички иштер министри Кашкар Жунушалиев, Башкы прокурор Өткүрбек Жамшитов ушул тапта өлкөбүздө түзүлгөн кырдаал боюнча маалымат беришти. Жыйындын жыйынтыгында тийиштүү чечим дагы кабыл алынды.

Алишер ТОКСОНБАЕВ, өз кабарчы