736 Бардыгы /

НАРЫН. Аймактарды өнүктүрүү саясаты биринчи кезекте өлкөбүздүн экспорттук потенциалын кеңейтүүгө гана багытталган. Мунун ичинде кайра иштетүү өнөр жайынын дагы, –деп баса белгиледи Кыргыз Республикасынын Президенти Сооронбай Жээнбеков Нарын шаарындагы «Сүт-азык» ЖАКсынын сүттү кайра иштетүүчү ишканасынын ачылышында.
– Өзүңөр билгендей, Кепилдик фондунун ресурстарынын көп бөлүгү бир катар аймактык долбоорлорго багытталууда. Айыл Банк  жана РСК Банк дагы облустарды жана айыл чарбасын каржылоонун үлүшүн жогорулатышты. Бүгүнкү күндө 60 пайыздан ашуун каражаттар бул максаттарга жумшалууда. Бул биринчи кезекте жумушчу орундардын жоктугунан болуп жаткан миграцияны кыскартууга, калктын кетишин азайтууга багытталган. Ал үчүн жергиликтүү тургундар өз продукциясын сатууга мүмкүнчүлүгү болгондой айыл өндүрүүчлөрүн колдоо керек!— деди  Кыргыз Республикасынын Президенти Сооронбай Жээнбеков.
Мамлекет башчысы айыл чарба өндүрүүчүлөрүн колдоо мындан ары дагы ыраатуу улантылат деп катуу ишендирди. Ал ушул өңдөнгөн сүттү кайра иштетүүчү ишканаларды Талас, Ош жана Нарын облустарында ачып, эми Ысык-Көл облусунда дагы ачканы жаткан «Үмүт и Ко» компаниясына терең ыраазычылыгын ачык билдирди.
– Биз кайра иштетүүчү өнөр жайына көп көңүл буруп жатабыз. Анткени, биздин айылдарда чийки зат жетиштүү. Бул сыяктуу ишканалардын ачылышы менен чет жака чыкпастан, өз үйүндө эле иштөөгө мүмкүнчүлүк пайда болуп жатпайбы. Ошондой эле бул өнүгүүгө жана мал чарбачылыгына заманбап технологияларды тартууга дем берет, — деп кошумчалады Сооронбай Жээнбеков.
Нарын шаарындагы «Сүт-азык» ЖАКдын ишке кирүүсүнө 100 миллион сом сарпталган. Ушул тапта суткасына 3 тонна сүт кайра иштетилет. Анын жалпы өндүрүш кубаттуулугу менен суткасына 150 тоннага чейин сүттү кайра иштетүү ыктымал. Президент Сооронбай Жээнбековго маалымдашкандай, завод Нарын облусундагы сүт сатуучу эң ири ишкана болот. Чийки зат жергиликтүү фермерлерден 18 сомдон 25 сомго чейин сатып алынат.

Алишер ТОКСОНБАЕВ, өз кабарчы