778 Бардыгы /

БИШКЕК. «Айыл банк» ААКсынын жана «РСК Банк» ААКсынын жетекчилери Аймактарды өнүктүрүү жана өлкөнү  санариптештирүү жылынын алкагында Аймактык долбоорлорду жана айыл чарбасын каржылоо боюнча көрүлүп жаткан чаралар жөнүндө Президент Сооронбай Жээнбековго кеңири айтып беришти.
– «Айыл банк акыркы үч-төрт жыл ичинде коммерция, соода, курулуш чөйрөлөрүндөгү бир катар бизнес-долбоорлорду каржылады. Азыр бул абалды оңдоп жатабыз. Анткени, биздин милдетибиз — каражаттардын 60 пайыздан кем эмесин айыл чарба тармагына гана багыттоо, — деп баса белгиледи «Айыл банк» ААКсынын башкармалыгынын төрагасы Бактыбек Шамкеев.
Бактыбек Шамкеев Кыргыз Республикасынын Президенти Сооронбай Жээнбековдун сунуштарына ылайык агроөнөр жай комплексин мындан ары карай өнүктүрүүгө өзгөчө көңүл бурулуп жаткандыгын баса белгиледи.
– Эгерде 2018-жылдын аягына карата каржы  ресурстарынын 52 пайызы айыл чарбасына жумшалган болсо, 2019-жылдын август айына карата анын көлөмүн биз 65 пайызга чейин көбөйттүк. Биз бул багытта ишибизди мындан ары дагы улантабыз. Президент айыл чарба продукцияларын кайра иштетүү ишканаларын каржылоонун жана айыл чарба азык-түлүктөрүнүн атаандаштыкка туруктуулугун арттыруунун эсебинен ички жана тышкы миграцияны азайтууга, жаңы жумуш орундарын түзүүгө өзгөчө басым жасады, — деди «Айыл банк» ААКсынын башкармалыгынын төрагасы Бактыбек Шамкеев.
Бактыбек Шамкеев ошондой эле экспортко багытталган ишканаларга жана Банк ишмердигине санариптик технологияларды киргизүүгө өзгөчө көңүл буруу милдети коюлгандыгын дагы кошумчалады.
Ал эми «РСК Банк» ААК  башкармалыгынын төрагасы Азизбек Оморкулов 2019-жылы Банктын кредиттик портфели 2018-жылга салыштырмалуу 1 миллард сомго көбөйүп, 13,6 миллард сом болгондугун белгиледи. Аймактык долбоорлорду каржылоо былтыркыга салыштырганда 21 пайызга көбөйдү. Ошондой эле «РСК Банк» ААКсынын жер-жерлердеги филиалдары аймактардагы ишкерлерди артыкчылык тартипте каржылап жатышкандыгын баса белгиледи. Азизбек Оморкулов ошондой эле санариптештирүүнүн  алкагында банкта  «РСК-24» мобилдик тиркемеси ишке киргизилгендигин дагы билдирди. Ал аркылуу салыктардын бардык түрлөрүн, айып пулдарды жана мамлектеттик бюджетке төлөмдөрдү жүргүзүүгө болот.
Бактыбек Шамкеев менен Азизбек Оморкулов «Айыл банк» ААКсы жана «РСК Банк» ААКсы кардарларды тейлөө убактысын кыскартуу жана ишти оптимизациялоо үчүн «Түндүк» ведомстволор аралык электрондук өз ара аракеттенүү системасына интеграциялануу боюнча активдүү иштеп жатышкандыгын дагы кошумчалашты.

Алишер ТОКСОНБАЕВ, өз кабарчы