730 Бардыгы /

ЧүЙ. Чүй облусунун Сокулук районунун Орок айылындагы орто мектепте жана Бишкек шаарындагы №12 мектеп-гимназиясында жемкорлукка каршы күрөш боюнча Бирдиктүү депозиттик эсептин каражаттарынын эсебинен жаңы корпустар курулат.Кыргыз Республикасынын Президенти Сооронбай Жээнбековдун катышуусунда аталган мектептерде жаңы корпустарды курууга капсула салуу аземи өткөрүлдү.

Иш-чараларга жергиликтүү тургундар, мугалимдер жана  куруучулар катышты. Сокулук районунун Орок айылында Мамлекет башчысы айылдыктар жана мугалимдер менен баарлашты.

-Ички миграциядан улам Бишкек шаарынын, Чүй жана Ош облустарынын орто мектептеринде окуучулардын саны көбөйүп,мектептерге балдар батпай, олуттуу көйгөй бар экендиги маалым. Жемкорлук менен күрөштөн Бирдиктүү депозиттик эсепке түшкөн акча каражатын мектептерди жана аларга кошумча окуу корпустарын курууга жумшайлы деп чечкенбиз, —деп баса белгиледи Президент Сооронбай Жээнбеков.

Президент дагы бир жолу жемкорлук түп орду менен жок кылуу мамлекеттин негизги максаты экенин баса белгиледи: – Белгилүү мамлекеттик ишмер Корчубек Акназаров менен көзү тирүү кезинде жолугушканыбызда, мага минтти эле: «Жемкорлук —бул сары чырмоок чөптөй,аны түп орду менен жулуп жок кылыш керек!» деп. Биз муну үчүн бардык аракеттерибизди көрөбүз, жемкорлукка каршы күрөш мындан ары дагы ыраттуу улантылат. Мындан тышкары Бирдиктүү депозиттик эсептин каражаттарын бала бакчаларды салууга дагы жумшайбыз!

Президент Сооронбай Жээнбеков келечекте ушул мектептердин бүтүрүүчүлөрү үчүн өлкөбүздүн өнүгүүсүн өз  салымын кошчу татыктуу жарандар болооруна тилектештигин дагы билдирди.

Ушул тапта Сокулук районунун Орок айылында сабактар үч мөөнөттө өтүлүп жатат. Кошумча корпустун курулушуна өтө муктаж. Эки кабаттуу кошумча курулуш корпусу мектептин кубаттуулугун 500 окуучу орунга чейин жогорулатмакчы.

Ал эми Бишкек шаарынын №12-мектеп-гимназиясы дагы окуу имаратын кеңейтүүгө абдан муктаж. Жалпы билим берүүчү мекеменин үч кабаттуу корпусу 385 орунга ылайыкталат. Курулуш иштерин 2020-жылы бүтүрүү пландалууда.

Айтмакчы, жемкорлукка каршы күрөштүн натыйжасында түшкөн каражаттар үчүн Бирдиктүү депозиттик эсеп 2018-жылдын июнь айында ачылган. Мамлекет башчысы Сооронбай Жээнебеков борбор калаадагы мектептерге барганда жемкорлук менен күрөшүүдөн атайын эсепке келип түшкөн каражаттар жаңы мектептерди, же алардын имараттарына кошумча корпустарды курууга багытталарын гана баса белгилеген.

Жүргүзүлгөн мониторингдин натыйжасында Кыргызстандын Билим берүү жана илим министрлиги 2019-жылга карата республика боюнча курулуш иштери баштала турчу 15 мектептин тизмесин түздү. Булардын жетекчиси Бишкек шаарында, 7 Чүй облусунда жана бирөө Ош шаарында.

Алишер ТОКСОНБАЕВ, өз кабарчы